گزارش‌ها از پاکستان می‌رسانند که مقام‌های امنیتی یک‌بار دیگر حلقه را بر مهاجران افغان تنگ ساخته و به بهانه‌های گونه‌گون آنان را اذیت می‌کنند.
بر بنیاد گزارش‌ها، پولیس پاکستان بیش از 100 مهاجر افغانستان را از ولسوالی نوشار خیبر پشتونخوا و ولسوالی‌های حافظ‌آباد و سیالکوت پنجاب بازداشت کرده است.
عبدالحمید جلیلی، اتشۀ امور مهاجران قونسلگری افغانستان در ایالت خیبر پشتونخوا به سلام‌وطندار می‌گوید که یک‌بار دیگر آزارواذیت مهاجران از سوی پولیس پاکستان افزایش یافته که این موضوع سبب نگرانی آنان شده است.
به گفتۀ آقای جلیلی، آنان به هدف رهایی این شمار افغان‌ها با مقام‌های پاکستانی در گفت‌وگو اند. او می‌گوید، هم‌اکنون 1 میلیون 300 هزار مهاجر افغانستان در این کشور ثبت شده و 600 هزار دیگر نا ثبت شده زنده‌گی می‌کنند.
بریالی میاخیل، رییس شورای مهاجران افغانستان در پاکستان نیز می‌گوید، مقام‌های پاکستانی در بدل رهایی مهاجران افغان درخواست ضمانت کرده‌اند.
هفتۀ پیش دفتر سازمان ملل در امور پناهنده‌گان اعلام کرده بود که مقام‌های پاکستانی با اذیت مهاجران افغانستانی قانون بین‌المللی مهاجران را نقض می‌کند.
