.jpg)
تخار ولایتی‌نینگ ایریم منطقه‌لریده بیر کیچه‌ده 4 کیشی و بیر هفته‌ده 10 کیشی قتل ایتیلگن و بولرنینگ عاملی ناقانونی قوراللی کیشی‌لر کوپه‌یگنی دییله‌دی. کون اوتیشی جنایی جرملر و سِرلی قتل‌لر میزانی آشیشی تخار یشاوچیلرینی خواطرگه سالیب و اولرنینگ تینچ‌لیگی‌نی قیین‌چیلیک‌که روپه‌ره قیلگن.
تخار مدنی فعاللریدن بیری عبدالفتاح ادیب‌نینگ ایتیشیچه، سیاسی رقابت‌لر و سیلاو کمپاین‌لری، شخصی دشمن‌لیک‌لر و یشاوچیلرنینگ خوفسیزلیگی تأمین‌لنیشی خصوصیده، پولیس کوچلری‌نینگ دقت‌سیزلیگی، جنایی جرملر میزانی آشیشی‌گه سبب بولگن. جناب ادیب گه کوره، پوسته‌لرده امنیتی کوچلر آز بولگنی باعث، بو کوچلر برچه منطقه‌لرنینگ خوفسیزلیگی‌نی تأمین قیله‌آلمه‌یدی.
تخار خبرچیلریدن بیری منیراحمد هدف نینگ ایتیشیچه، اوتگن آی‌لرده تالقان شهری‌نینگ خوفسیزلیک وضعیتی جوده هم یمان بولگن و یالغیز سونگی بیر آیده چمه‌سی 30 قتل رویخط گه آلینگن.
تخار ولایتیده جنایی جرملر و سِرلی قتل‌لر میزانی آشگنینی تصدیق‌لگن مذکور ولایت پولیس قومندانلیگی سوزلاوچیسی خلیل اسیرنینگ ایتیشیچه، سونگی کونلرده یوز بیرگن قتل‌لرنی کوپینچه‌سیگه حقوقی جنجل‌لر، عایله‌وی زوره‌وانلیک‌لر و شخصی خصومت‌لر سبب بولگن. جناب اسیر گه کوره، واقعه عامل‌لریدن کوپینچه‌سی پولیس تامانیدن قولگه آلینگن.
تخار پولیس قومندانلیگی سوزلاوچیسی‌نینگ کوپه‌یتیریشیچه، جنایی جرملر اینیقسه سِرلی قتل‌لر اوتگن ییل گه نسبتن جاری ییل‌نینگ بیرینچی اوچ آیی‌ده 30% کوپه‌یگن و کوپینچه واقعه‌لرده قربان بولگن‌لرنینگ تانیش‌لری و یقین‌لری قتل‌لرنی اصلی عاملی تانیلگن.
