افغانستان ملی بیرلیک حکومتی تامانیدن طالب‌لرنینگ برابریده اوربند اعلان ایتیلیشی و بو اوربندگه طالبان گروهی تامانیدن ایجابی نتیجه بیریلیشی اهالی تامانیدن خوش قرشی‌لندی.
بوگون «یکشنبه» کابل‌ده خبری ییغین اوتکزگن قطار مدنی اداره‌لر، یاشلر و دین عالم‌لری، حکومت و طالبان گروهی تامانیدن اعلان ایتیلگن وقتینچه‌لیک اوربندنی خوش قرشی‌لب و بو وقتینچه‌لیک اوربند دایمی بولیشی گه امید بیلدیرگن‌لر.
مدنی فعال عمر یعقوبی‌نینگ ایتیشیچه، برچه‌میز مسلمان بولگنیمیز اوچون، بیزلرنینگ آره‌میزده اوروش یوز بیریشی شرعی ایمس دیر و شو یوزه‌دن دایمی اوربند قیلیشیمیز کیره‌ک.
شونینگدیک، دین عالم‌لریدن بیری میرحسین شاه ناصری، حکومت و طالبان گروهی‌نینگ اوربندینی خوش قرشی‌لب و بو حرکت مملکت‌ده دایمی تینچلیک تأمین‌لنیشی توغریسیده امید بیلدیرگن.
عین حالده، اوشبو ییغینده اشتراک قیلگن تینچلیک عالی کینگشی‌نینگ نماینده‌سی امین‌الدین مظفری، دایمی اوربند اعلان ایتیلیشی خصوصیده، تینچلیک عالی کینگشی هر تامانلمه تیارگرلیک آلگنیدن خبر بیرگن.
افغانستان حکومتی بیرینچی مرته قویاش جاری ییل، 17- جوزا ده طالب‌لرنینگ برابریده بیر تامانلمه اوربند اعلان قیلدی. بو اوربند روزه نینگ 27- کونیدن هییت نینگ 5 گچه دوام ایتیشی ممکن. افغانستان جمهور رئیسی تامانیدن طالب‌لرنینگ برابریده اوربند اعلان قیلینگن ویدیویی پیام‌دن ایکی کون اوتگنیدن سونگ، مذکور گروه بیر خبرنامه ترقه‌تیب ایتیشیچه، یالغیز روزه بیرم هییتی‌نینگ اوچ کونیده امنیتی کوچلرنی هدف قرار بیرمه‌یدیلر؛ بیراق چیت‌ایللیک کوچلرنینگ برابریده هجوملریگه دوام بیره‌دیلر.
