.jpg)
امنیتی کوچلرصفی‌گه بارگنیدن ایکی آی اوتمسدن عایله کیچیک اعضاسی، ینگی تورمیش قورگن عبدالمتین، عایله‌سی نینگ یشش امکانیت‌لری یخشیلنیشی اوچون آته کسبی ایکینچی‌لیک‌نی ترک قیله‌دی.
تورمیش اورتاغی نینگ ایتیشیچه، بیره‌م مناسبتی بیلن قیلگن تعطیلاتده، اوی تامان کیلگونیچه ایرته‌لب تیلفون آرقه‌لی او بیلن گپلشگن و سیوه‌دیگن آوقت‌لری پیشیریشینی ایسته‌گن، اما ساعت اوتمسدن اونی اولیم خبری کیله‌دی و عایله‌سینی کوریشگه وقت بیریلمیدی.
عبدالمتین‌نی آنه‌سی نینگ ایتیشیچه، بغرینی ییزیب باله باقگن ایدی، اما ناکاره دولت قولیدن کوزنی یومیب آچگونچه بیر عمر چیککن زحمتی هیچ بولدی.
بو 22 یاشر ییگیت، میدان وردک پولیس اکادمیه‌سیدن حربی فنلر اورگه‌نیب چیققن 32 سربازنی بیری ایکن که اوچ هفته آلدین قلعه حیدرخان منطقه‌سیده ایکی خودکش هجومچی شخص نشانیگه آلیندی. اوشبو هجوم‌ده 32 کیشی هلاک و باشقه 58 دن آشه کیشی هم یره‌نلدی.
.jpg)
عبدالمتین کابل شکر دره تومنی یشاوچیسی، آته کسبی ایکینچی‌لیک ایکن.
عبدالمتین نینگ اکه‌سی شیرآغا، ایناغه‌سی اقتصادی قیینچی‌لیکلر سبب امنیتی کوچلر صفیگه قوشیلگن ایکن‌لیگنی معلوم قیله‌دی. او، ایناغه‌سینی پولیس صفیدن آلیش اوچون اورتاقلرینی اورته گه سورگن، اما تلاشلری نتیجه بیرمه گن.
شیرآغا نینگ ایتیشیچه، جنگریلر بیلن دولت نینگ قولی بیر، بولمه‌گنده پایتخت یقینیده قراولی بولمه‌گن پولیس کاروانی نشانگه آلینیشی امکانیتدن اوزاق.
اوشبو عایله ایکی اولادی هم عبدالمتین‌دن آلدین مملکت‌دن دفاع قیلیش یولیده جان بیرگن ایکن.
هردایمکی دیک میدان وردک پولیس اکادمیک کاروانی هجوم‌گه آلینیشی بیلن حکومت تیکشیروو هیاتینی محلگه یوباردی. اوشنده‌یکه بو هیأت گزارشی رسانه‌لرگه بیریلمه‌دی، اما جمهور رییس‌گه واقعه معلوم بولیشی بیلن محلی و امنیتی رسمی‌لردن 10 کیشی ایشدن آلیندی.
ینگی فراغت حاصل قیلگن عسکرلر جانیگه بولگن هجوم مسؤولیتی‌نی طالبان بوینیگه آلدی و ایتیلیشیچه، طالب‌لرنینگ مملکت امنیتی چارچوبه‌سیده جاسوسلری بولمه‌گن ده ایدی، بونقه حادثه روی بیریش امکانیتی بولمس ایدی.
