د بلخ ولایت د پوهنې ریاست مسولین وايي، چې د ناامنیو زیاتېدلو دې ته اړ کړي، چې د چاربولک، البرز، شورتپه، چمتال، دولت اباد ولسوالیو او یو شمېر نورو سیمو کې د سواد زده کړې مرکزونه بند کړي.
د دغه ولایت د پوهنې رییس مولوی عبدالعزیز عزیزي وايي، سره له دې چې د دې ولایت خلک د سواد زده کړې له پروګرامونو سره لېوالتیا لري، خو د ناامنیو د زیاتېدلو او اقتصادي ستونزو له امله نه شي کولای درس ووایي.
د نوموړي پر خبره، اوسمهال ۳۳ زره او ۸۰۲ تنه د زیات عمر لرونکي نارینه او ښځې د سواد زده کړې په مرکز کې زده کړې کوي.
دا په داسې حال کې ده، چې تېر کال د بلخ ولایت په مرکز او کلیو کې ۱۶ زره ۱۴۰ تنه زده کوونکي د سواد زده کړو له بېلابېلو مرکزونو څخه فارغ شول.
عزیزي زیاتوي، د نا تایید شویو شمېرو له مخې ۸۰ سلنه د کلیوالو سیمو او ۲۰ سلنه د ښار اوسېدونکي بې سوداه دي. دی وايي، اوسمهال په دې ولایت کې ټولټال ۵۷۸ د سواد زده کړې مرکزونه، چې ۴۹۳ یې د مېرمنو له پاره ځانکړي شوي دي؛ په ټول ولایت کې فعالیت کوي، چې دغه شمېر د بې سوادو کسانو د شمېر په پرتله د بسنې وړ نه دي.
په ورته وخت کې د بلخ ولایت د امنیت امر عبدالرزاق قادري وايي، چې پولیس به د سواد زده کړو مرکزونو د امنیت خوندیتوب له پاره له هيڅ ډول هڅې ډډه و نه کړي.
بلخ د هېواد په شمال کې زیات نفوس لرونکو ولایت دی، وویل کیږي، چې په دې ولایت کې د شمال د نورو ولایتونو په پرتله زیات شمېر د سواد زده کړې مرکزونه موجود دي.
