بلخ ولایت سرپرستی عطامحمد نور بوندن نیچه کون آلدین اولدیریلگن شخصلر خانهدانی بیلن اوچرهشیب فرزندلری قاتللرینی قولگه آلینیشی بارهسیده وعده بیرگن. سرپل ولایتینینگ اون اوچ یشاووچیسی بوندن نیچه کون آلدین کشنده – زارع منطقهسیده نامعلوم قوراللی شخصلر تامانیدن قولگه آلینیب سونگ اولدیریلگن ایدی.
افغانستانلیک هزارهلرگه منسوب مذکور عایلهلر فرزندلری قاتلی قولگه آلینیشی اوچون دولت مسؤول ایکنلیگینی ایتگنلر.
بلخ ولایت سرپرستی عطامحمد نور، شمالی ولایتلر برقرارلیگینی ایسته میدیگن شخصلرنینگ حادثه آرتیده قوللری بارلیگینی ایتگن.
قتل ایتیلگن مذکور اون اوچ کیشی واقعهسینی جنایت دیگن جناب نور، تیزلیکده پرده آرتیدهگی دسیسهلرنی فاش قیلیشدن سوز بیرگن.
شونینگدیک جناب نور، ایریم تیورهکلر بوندهی عمللرنی صادر قیلیش بیلن شمالی ولایتلرده قومی قرمه قرشیلیکلرنی اورته گه کیلتیشیرگه سعی وحرکت قیلهدیلر دیگن.
بو بیرینچی مرته ایمس افغانستان عمومی یوللریده یولاووچیلر نامعلوم قوراللی شخصلر طرفیدن اولدیریلسه. اما، معین بیر قومگه تیگیشلی شخصلرنی شمالی بلخ ولایتیده اولدیریلیشی هنوزگچه کمدن – کم کوزه تیلگن.