بلخ امنیتی رسمی‌لری، ینگی ییل نوروز بیره‌می‌نینگ امنیتی بوتونله‌ی تأمین ایتیلگنی توغریسیده مزارشریف یشاوچیلری و مهمانلرگه ایشانچ بیره‌دی.
نوروز بیره‌می‌نینگ خوفسیزلیگی‌نی تأمین‌لش گه مسؤول شمال نظم عامه پولیسی 6- لوا ییریک ساتنمنی محمد عرب‌نینگ ایتیشیچه، امنیت تأمین ایتیلیشی خصوصیده، توانی باریچه سعی و حرکت قیله‌دی.
نوروز بیره‌می‌نینگ خوفسیزلیگی‌نی تأمین‌لش بیرینچی باسقیچی جاری ییل 20 دلو ده باشلندی و یکشنبه کون عصر چاغی یکونلندی و ایکینچی دوری بوگون باشلنگن و باشقه ایکی-اوچ کون‌گچه دوام ایته‌دی.
بلخ پولیس قومندانلیگی‌نینگ خوفسیزلیک اورین باسری عبدالرزاق قادری‌نینگ ایتیشیچه، بوگون ایرته‌لب دن شهر مرکزی و روضه گه کیره‌دیگن برچه یوللر توسیلگن. قادری‌نینگ کوپه‌یتیریشیچه، امنیتی کوچلر نوروز بیره‌می‌نینگ امنیتی‌نی تأمین قیلیش اوچون بوتونله‌ی تیارگرلیک آلینگن.
اونگه کوره، حمل آیی‌نینگ اوچینچی کونیده نوروز بیره‌می‌نینگ خوفسیزلیگی‌نی تأمین‌لش اوچینچی باسقیچی باشلنه‌دی و 40 کون‌گچه دوام ایته‌دی.
شونینگ‌دیک، مملکت شمالی‌ده 209 شاهین قول اردو قومندانی امان‌الله مبین، قتناو یوللر و مزارشریف شهری‌نینگ خوفسیزلیگی تأمین‌لنیشی توغریسیده ایشانچ بیره‌دی. اونینگ ایتیشیچه، نوروز مهمانلری تینچلیک و خواطرلنمس دن نوروز بیره‌مینی اوتکزیشلری کیره‌ک.
عین حالده، مزارشریف یشاوچیلریدن بیرقطاری، امنیتی کوچلرنینگ سعی و حرکت‌لرینی خوش قرشی‌لب و بو ییل نوروز بیره‌می یخشی بیر شکلده اوتکزیلیشی توغریسیده امید بیلدیره‌دیلر.
لیکن؛ اوتگن ییل‌لرگه قرشی حاضرگچه مزارشریف گه کیلگن مهمانلر سانی آز دیر. خلق ایسه احتمالی ترورچیلیک واقعه‌لر یوز بیریشیدن قورقیب نوروز بیره‌مینی نشانلش اوچون مزارشریف باریش‌گه اونچه‌لیک علاقه کورستمه‌یدیلر.
