ملی مدافعه وزیرلیگی کابل-بغلان و بغلان-کندز قتناو یوللری آچیلگنیدن خبر بیرگن.
مذکور وزیرلیک بیر خبرنامه ترقه‌تیب یازیشیچه، اوتگن کیچه مدافعه و امنیتی کوچلر عملیاتی نتیجه‌سیده اوشبو قتناو یوللر کیلیب-کیتیش یوزیگه آچیلگن.
ملی مدافعه وزیرلیگی نینگ خبرنامه‌سیده کیلیشیچه، شونینگدیک مذکور عملیات نتیجه‌سیده کیله‌گی، جرخشک، جنگل‌باغ و چهارشنبه‌تپه منطقه‌لری طالبلردن تازه‌لنیب و مذکور گروه اعضالری گه آغیر تلفات یتیشگن.
عین حالده، بغلان عامه ساغلیک ریاستی مسئوللری نینگ ایتیشیچه، اوشبو ولایتده‌گی 13 کون‌لیک آتیشمه‌ده، 13 تینچ‌اهالی و 50 حربی نینگ جسدی کسلخانه‌لرگه انتقال بیریلگن.
بغلان عامه ساغلیک ریاستی باشلیغی محب‌الله حبیب نینگ ایتیشیچه، عیاللر و باله‌لر شامل تن‌جراحتی کوتارگن 90 تینچ‌اهالی و شونینگدیک امنیتی کوچلردن 60 یره‌دار کسلخانه‌لرگه انتقال تاپگن.
عین حالده گذرگاه نور تومن ولسوالی عبدالحنان اندرابی نینگ ایتیشیچه، بوگون (جمعه 22- سنبله) امنیتی کوچلر مردمی کوچلر حمایتی بیلن مذکور تومن و خوست و فرنگ تومنی بناسینی طالبان نظارتی‌دن چیقارگنلر.
جناب اندرابی گه کوره، اوتگن نیچه کونده طالبان گذرگاه نور تومنی‌ده، پولیس قومندانلیگی و تومن بناسی شامل بیر قنچه حربی واسطه‌لرنی اوت گه یاندیریب و محل یشاوچیلری گه کوپینچه مالی ضرر یتیشتیرگنلر.
امنیتی منبع‌لرنینگ سلام‌وطندارگه ایتیشیچه، مذکور آتیشمه‌لرده طالبان و مردمی کوچلر گه آغیر تلفات یتیشگن، بیراق قربانیلر توغریسیده حاضرگچه بیللی رقم قولگه کیلمه‌گن.
شو توغریده:
- بغلان قتناو یولی‌نینگ یوللاوچی‌لری یول توسیلیشی دوامیدن شکایت قیلیشگن
بغلان؛ گذرگاه‌‌نور تومنی ینه‌بیر مرته طالبان قولیگه سقوط قیلدی
بغلانده آتیشمه‌لر دوام ایتماقده؛ حاضرگچه 90 دن آرتیق کیشی هلاک و یره‌لنگن
بغلان پولیسی سوزلاوچیسی احمدجاوید بشارت نینگ ایتیشیچه، شونینگدیک اوتگن کیچه دولتی کوچلر نهرین تومنی نینگ نیچه قیشلاغی نی نظارتگه آلگنلر و اوشبو آتیشمه‌لرده، 2 طالب هلاک و باشقه 1 طالب یره‌لنگن و مذکور گروه نینگ بیر قنچه حربی جهازلری امنیتی کوچلرنینگ قولیگه توشگن.
شونده‌ی بیر حالده، بغلان یشاوچیلری امنیتی نهادلردن مذکور ولایت قتناو یوللریده طالبان هجومی نی آلدینی آلیش اوچون اوشبو گروه جنگریلریدن تازه‌لنگن ییرلرده پوسته قوریش‌لرینی سوره‌گنلر.
بغلانده 13 کون‌لیک اوروش جریانی‌ده مذکور ولایت یشاوچیلری گه کوپینچه مالی ضرر یتیشگن، 10 یوک تاشووچی و تیلری موتر اوت گه یانیب و اونلرچه دکان و یشش اویلر تخریب بولگن.
