د بغلان ولایت ځېنې کروندګر وايي، که حکومت د دوی د میوو حاصلاتو ته سړې خونې او د صادراتو زمېنه برابره نه کړي دوی، به د دویم ځل له پاره کوکنار وکري.
کروندګر په داسې حال کې دغه څرګندونې کوي، چې روان کال په دغه ولایت کې د میوو حاصلات د تېر کال په پرتله ښه وو، خو اوس دوی وايي، چې د سړو خونو او بازار نشتوالي دوی ناهیلې کړي دي.
د بغلان ولایت بڼوال زیاتوي، دحپلو حاصلاتو له پاره سړې خونې نه لري، نو ځکه د میوو د حاصلاتو راشکولو په وخت کې خپل حاصلات په کمه بیه پلوري.
د کروندګرو له خوا د کوکنارو کرلو خبرداري د کرنې برخې شنونکي اندېښمن کړي دي.
د بغلان ولایت د پوهنتون استاد عبدالسمیع وفا وايي، چې د سړو خونو جوړولو له امله به خلک د کال په څلورو فصلونو کې تازه میوو ته لاس رسی ولري.
وفا وايي، د افغانستان میوې په کمه بیه پاکستان ته وړل کیږي او هلته د بسته بندۍ وروسته په څو چنده لوړه بیه بېرته افغانستان ته صادري ګيږي.
د دغه ولایت د کرنې او مالدارۍ چارواکي د ګروندګرو او بڼوالو دغه ستونزه مني او وايي، چې دوی د سړو خونو د جوړولو په هڅه کې دي.
د بغلان ولایت د کرنې او مالدارۍ سرپرست رییس محمد سالم صافی له حکومتي مسولینو غواړي، چې په دې برخه کې پاملرنه وکړي او ګروندګر دې د زیان څخه وژغوري.
د اقتصادي چارو شنونکي وايي، چې د سړو خونو جوړول، ترانزیټ ته پاملرنه او د تخنیکي امکاناتو موجودیت په صورت کې د هېواد حاصلات او صادرات زیاتیږي.