وزارت مالیه فعالیت بازارچه‌های مرزی میان بدخشان و تاجیکستان را متوقف کرده است
ریاست حمایت و انکشاف گمرکات ریاست عمومی گمرکات وزارت مالیه به تاریخ 16 سرطان ام‌سال در مکتوب رسمی به مدیریت گمرکات بدخشان دستور داده است که فعالیت بازارچه‌های مرزی این ولایت متوقف شود. وزارت مالیه هدف از این اقدام را جلوگیری از زیان‌هایی می‌داند که بازارچه‌های مرزی به اقتصاد و صنعت افغانستان وارد می‌کند.
در این مکتوب که یک نسخۀ آن به سلام‌وطندار رسیده آمده، ادارۀ حمایت از سرمایه‌گذاری مسدودسازی بازارچه‌های مرزی بدخشان را به ریاست جمهوری پیشنهاد کرده و ریاست جمهوری هم آن را پذیرفته است.
مدیر گمرکات بدخشان از سخن گفتن در این باره خودداری می‌کند، اما باشنده‌گان مناطق مرزی بدخشان این تصمیم دولت را به زیان مردم می‌دانند.
عبدالله ناجی نظری، عضو شورای ولایتی بدخشان نیز بستن بازارچه‌ها را برای باشنده‌گان مناطق مرزی این ولایت مشکل‌ساز می‌خواند.
گفته می‌شود که دولت به خاطری اقدام به بستن بازارچه‌های مرزی در بدخشان کرده است که درآمدی از این طریق به دست نمی‌آورد.
غلام‌محمد آتشپور، معاون پیشین اتاق تجارت بدخشان می‌گوید، در گذشته با ارایۀ دلایل قناعت‌بخش از بستن بازارچه‌های مرزی جلوگیری کرده بودند.
محمدزکریا سودا، والی بدخشان می‌گوید، بازارچه‌های مرزی به صورت محلی برگزار می‌شدند و ادارۀ محلی تلاش می‌کند از بسته‌شدن آنها جلوگیری کند.
او می‌گوید که پس از رفع نگرانی‌ها در بارۀ ویروس کرونا، این بازارچه‌ها دوباره فعال خواهد شد.
بازارچه‌های مشترک مرزی در بدخشان به صورت هفته‌وار برگزار می‌شدند و ساکنان مناطق مرزی افغانستان و تاجیکستان داشته‌های محلی‌شان را در این بازارچه‌ها مبادله می‌کردند.
در این زمینه:
ایران از طریق بازارچه‌های خود کالاهای بازرگانی را به افغانستان قاچاق می‌کند
