برشنا شرکتی مسؤوللری‌نینگ ایتیشیچه، برق قیین‌چیلیگی حل ایتیلیشی اوچون کیله‌جک هفته باشله‌نیشیده برشنا شرکتی و صنعت و سوداگرلیک اتاقی‌دن تشکیل ایتیلگن بیر هیأت ایران باریشی ممکن و بو هیأت حاضرگی 30 میگاوات برق‌نی کمیده 50 میگاوات گه آشیریش اوچون سعی و حرکت قیله‌دی.
بوگون هرات‌ده خبری بیر ییغینده نطق سوزله‌گن برشنا شرکتی عمومی باشلیغی امان‌الله غالب نینگ ایتیشیچه، ایران دولتی بو مملکتده ایسیق‌لیک درجه‌سی یوقاری کیتگنی و سوو توغان‌لری‌نینگ سووی کمه‌یگنی باعث، افغانستان، عراق و پاکستان مملکت‌لریگه صادر قیله‌دیگن برق نی کیسگن.
جناب غالب گه کوره، شرطنامه باغلنگن 110 میگاوات برق دن ایران دولتی هرات گه 20-30 میگاوات برق بیره‌دی و افغانستان بیلن مذکور مملکت‌نی آره‌سیده امضاءلنگن شرطنامه اساسیده، ایران‌نینگ بو ایشی گه هیچ قیین‌چیلیک یوق دیر.
برشنا شرکتی‌نینگ عمومی باشلیغی گه کوره، اولر سلما توغانی‌نینگ اوچیریلیب قوییلگن 2 توربینی‌نی فعال قیلیش اوچون سعی و حرکت قیله‌دی و بو توغاندن چیقه‌دیگن 14 میگاوات برق و ترکمنستاندن کیله‌دیگن 70 میگاوات برق هرات شهریده برق قیین‌چیلیگی بیرآز حل قیلیشی ممکن.
بیراق، هرات حاکمی سوزلاوچیسی جیلانی فرهادنینگ ایتیشیچه، محلی اداره و تومن‌لرنینگ ایکینچی‌لری آره‌سیده بولگن کیلیشوو و سلما توغانی‌نینگ سووی کمه‌یگنی باعث، مذکور توغان توربین‌لری کوز موسومی گچه فعال بولمه‌یدی.
عین حالده، هرات یشاوچیلریدن بیرقطاری، مذکور ولایتده برق کم‌لیگی‌دن خواطر بیلدیریب ایتیشیچه، ایران برقی کیسیلگنی باعث، اهالی زیان کورگن.
اولرگه کوره، برق کیلیب و کیتیشی برقی اسکونه‌لرگه زیان ییتکیزگن و شونینگدیک، برق یوقلیگی ایچیم‌لی سووگه قول تاپیش‌نی قیین قیلگن.
هرات ولایتی‌نینگ برشنا شرکتی بیانات‌لری اساسیده، هرات ولایتی گه نیاز برق دن 60% ایران دن و باشقه 40% ترکمنستاندن تأمین ایتیله‌دی و ایران برقی کیسیلگنی باعث، اهالی برق کم‌لیگی قیین‌چیلیگی‌گه روپه‌ره بولگن.
