بدخشان ولایتیده نمایندهلر کینگشی سیلاوینینگ دستلبکی نتیجهسی اعلام بولگنیدن سونگ، 75 نامزد دن یالغیز 9 تهسی دستلبکی رویخط گه کیریتیلگن و اوشبو دستلبکی رویخطگه آلینمهگن نامزدلردن بیری سفرمحمد مبارزنینگ طرفدارلری کشم-فیضآباد قتناو یولینی باغلهگنلر.
اعتراضچیلردن بیری عبدالحینینگ ایتیشیچه، اولرنینگ آوازلری گه قول اوریلگن و سیلاولر ایرکین کمیسیونی اولرنینگ ایستکلریگه ایجابی جواب بیرگونگهقدر ناراضیلیکدن قول تارتمهیدیلر.
کشم-فیضآباد قتناو یولیده بند قالگن یوللاوچیلردن بیری حفسهنینگ ایتیشیچه، ناراضچیلر یولده باغلب قویگنلر و یوللاوچیلرگه قرشی زورهوانلیک قیلهدیلر.
حفسهنینگ ایتیشیچه، ناراضچیلر موترلرنینگ شیشهلرینی سیندیریب و یوللاوچیلرنی کلتکلگنلر.
بدخشان پولیس قومندانلیگینینگ سوزلاوچیسی ثناالله روحانینینگ سلاموطندارگه ایتیشیچه، بدخشان ولایتیده نمایندهلر کینگشی سیلاوینینگ دستلبکی نتیجهسی اعلام بولگنیدن سونگ، سفرمحمد مبارزنینگ طرفدارلری سیلاوده ساختهکارلیک یوز بیرگنی دلیلی بیلن ناراضلیک نمایش یولگه قویب کشم-فیضآباد قتناو یولینی باغلگنلر.
بدخشان پولیس قومندانلیگینینگ سوزلاوچیسیگه کوره، موضوعنی حل قیلیش اوچون بدخشان محلی حکومتی تامانیدن بیر هیأت کشم تومنیگه یوباریلگن.
مذکور یولده بند قالگن قطار یوللاوچیلر و موتر هیداوچیلرنینگ ایتیشیچه، کشم-فیضآباد قتناو یولی آچیلمهگن صورتده، اولر کوپینچه زیان قیلهدیلر.
مذکور یولنی ناراضچیلر تامانیدن باغلنگنیدن نیچه ساعت اوتماقده، بیراق حاضرگچه هیچبیر حکومتی نهاد اولرنینگ ایستکلریگه دقت قیلمهگن.
