بدخشان ولایتیده یوز بیرگن قار کوچکیسی نتیجه سیده 6 کیشی حیاتدن کوز یومگن‌لیگی خبر قیلیندی. شونینگ دیک بو طبیعی واقعه ده باشقه 7 نفر یره لنگن. مذکور قار کوچیسی ولایت نینگ کلف زار و یمگان ولسوالیک لریده روی بیرگن. ییگیرمه دن آرتیق تورر بنا قار آستیده قالگن‌لیگی هم ایتیله‌دی. ولایت محلی بلند مرتبه‌لی رسمیلری سوزلریگه قره گنده، قلین قار یاغیش‌لر عاقبتی‌ده یمگان، اشکاشم و شغنان ولسوالیک‌لری نینگ عمومی یولی ترافیک یوزیگه یاپیلیب قالگن. قارنینگ قلین‌لیگی باعث جسدلر هنوز هم قار استیدن چیقاریلمه گن‌لیگی ایتیله‌دی. بدخشان ولایتی‌نینگ محلی مسوول‌لری تورر بنالری قار آستیده قالگن خانه دان اعضالریگه زیان ییتمه گن لیگی‌نی ایتیب، اوشبو عایله‌لرگه تیزلیکده انسان پرورلیک یاردم‌لر ییتکیزیب بیریلیشی‌نی معلوم قیلگن‌لر.
بدخشان شاشیلینچ یاردم ییتکزیب بیریش اداره سی حادثه دن جبر کورگن‌لرگه طیاره آرقلی کومک ییتکزیلیشی‌نی سوره گن. ایتیلیشیچه، ولایت نینگ اون اوچ ولسوالیگی‌نی باغلاوچی عمومی یول قلین قار یاغیشی نتیجه سیده یاپیلیب قالگن. بدخشان ولایتیده قیش‌ده قلین قار یاغیشی هر ییلی ولایت نینگ اونلب اهالیسی حیاتیگه ضامن بوله‌دی. جاری ییل بهار ده‌گی یاغین گرچیلیک‌لر سبب بدخشان نینگ ارگو ولسوالیگیده تاغ سیلجیشی طفیلی اونلب انسان حیاتدن کوز یومگن ایدی.
