کوچمه کتابخانه مبتکری صابر حسینی، تورت آی آلدین، 200 جلد شعر، حکایه و رسم کتابی بیلن بامیاننینگ شهری، بازاری و کوچهلریگه ریکاب اوریب و خلقنی کتاب اوقیش و کتاب مدنیتی بیلن تانیشتیرگن، حاضر ینگی بیر تشبثگه قول اوریب بالهلرگه تیگیشلی کتابلردن بیر توپلمینی «بالهلر بنیادی» ناملی کتابخانهده کورگزمهگه قویگن.
بامیان بالهلری عجایب بیر علاقه بیلن «بالهلر بنیادی» ده توپلنگن. صابر تورلی و ایری کتابلرنی اولرگه کورستهدی و ایریم کتابلردهگی رسمنی کوریب بالهلر بیلن بیرگه کولهدی.
صابرنینگ ایتیشیچه، بالهلر کوچه و بازار و خطرلی اویینلردن قیتریلیب، کتاب اوقیش مدنیتیگه آلقیشلنیب ترغیب ایتیلیشی کیرهک. جناب صابرگه کوره، کوچمه کتابخانه خلق تامانیدن خوش قرشیلنیب و بامیان یشاوچیلریدن کوپینچهسی اونینگ بو ایشگه آلقیشلهگن.
8 یاشر مهناز ناملی باله، اوشبو کتابخانهنی آچیلیش مراسمیده بالهلر بنیادیگه کیلیب و کتابلردن بیرینی ایچیده بولگن سنبل و لاله شعرینی باشقهلرگه اوقیشگه آلگن.
باشقه بیر گلناز ناملی باله، کتاب اوقیش اوچون بالهلر بنیادیگه کیلگن. او مکتبده 9- صنف اوقووچیسی بولیب ایتیشیچه، حاضرگچه ایکی کتابنی کتابخانهدن قرض آلیب اوقیگن. گلنازنینگ ایتیشیچه، حاضرگچه اوقیگن اینگ یخشی کتابی، ویکتور هوگونینگ بینوایان کتابی بولگن.
عین حالده، بامیان ولایتینینگ مدنیت و معلومات ریاستی باشلیغی، مذکور ولایتده معیاری کتابخانه یوقلیگی توغریسیده سوز یوریتیب ایتیشیچه، بامیان ولایتیده 7 دولتی کتابخانه و 10 خصوصی کتابخانه موجود؛ بیراق اوشبو کتابخانهلرده امکانیت کملیگی باعث، کتاب اوقیش اوچون مناسب فضاسی یوق دیر.
بالهلر بنیادینینگ کتابخانه آچیلیش مراسمی چیککه سیده، «بیر آدیم و مینگ کولگو» ناملی رسم کورگزمهسی آچیلگن. اوشبو کورگزمهده، کوچمه کتابخانهنی تورت آیلیک فعالیتی جریانیدن آلینگن رسملر کورگزمهگه قوییلگن.
