بامیان ولایت مرکزی فولادی قیشلاغی‌ده اونلب تشقی و ایچکی مهمان‌لر اشتراکیده حوت آیی نینگ 8- سی جمعه کونی‌دن بویان اسکی بیلشووی یولگه قوییلگن.
بیلشوونینگ بیرینچی کونی‌ده 34 کیشی اسکی اویینچی‌سی قتنشگن‌لر. اولردن 14 ته‌سی تشقی اسکی اویینچی‌لری بولگنی ایتیله‌دی. مذکور سپورتچی‌لر فرانسه، امیریکه، انگلستان، آلمان، بلژیک و سویس دولت‌لردن اوشبو بیلشووده اشتراک قیلگن‌لر.
مذکور بیلشوونی یولگه قویگن‌لرنینگ ایتیشلریچه، بونده‌ی بیلشوولرنی اوتکزیش‌دن نیت قیشگی اویین‌لرنی رواجلنتیریش همده سیاحلرنی اعتبارینی جلب قیلیش دیر.
شونینگ دیک بونده‌ی اویین‌لرنی یولگه قوییلیشیدن نیت افغانستان ایریم حدودلرینی دنیا سیاحلری‌گه تَنیشتیریش بولگنی تاکیدلنه‌دی.
بامیان گردشچی‌لیک بیرلشمه‌سی نینگ مسوولی رضا ابراهیمی‌گه کوره، اوتگن تورت ییل جریانیده اسکی اویینی ساحه‌سی‌ده کوزگه کورینرلی درجه‌ده آلغه سیلجیش یوز بیرگن. اما، او بو بولیم‌ده ییترلی امکانیت بولمه‌گن لیگی‌نی هم تیل‌گه آلگن.
بامیانده یولگه قوییلگن اسکی بیلشووی دوامی‌ده ولایت نینگ شهیدان قیشلاغی قیزلردن عبارت اسکی چی‌لر اشتراکیده هم اسکی اویینی اوتکزیلگن.
چمه‌سی 20 دقیقه دوام ییتگن مذکور بیلشووده اسکیچی‌لر بیر کیلو متر یول یوریگن‌لر.
بو بیلشووده بیرینچی اورین‌نی کسب قیلیش‌گه موفق بولگن معصومه حسینی، باشقه خانه دانلردن هم اوز قیزلرینی بونده‌ی اویین‌لرگه کیریش اوچون رخصت بیریشلری‌نی سوره‌گن.
بیلشوو سونگی‌ده بیرینچی، ایکّینچی و اوچینچی اورین‌نی کسب قیلگن‌لر مکافاتلر بیلن تقدیرلگنلر.
اوشبو مسابقه بامیان گردشچی‌لیک بیرلشمه‌سی طرفی‌دن اوتکزیلگن.
