بعضی آته – آنهلر کیچکین تایلرینی اوخلهتهیاتیب، اولرنی قارانغولیکدن قورقیتیشگه، اجینه یاکه یلمانغیز حقیده واهمهلی سوزلرنی ایتیب اولرنی تیزراق اوخلهتیب قوییشگه عادتلنیشگن. روحشناسلر ایسه بو نهایتده ناتوغری اصول ایکنلیگینی تاکیدلشهدی.
قارانغولیکدن قورقیش 3-5 یاشلی کیچکینتایلرگه خاص خصوصیت دیر، دییه حسابلشهدی متخصصلر. چونکی باله بو یاشگه کیلیب معین بیلیمگه ایگه بولهدی. او ایرتک ایشیتگن، فلملر کورگن بولیب، اوزی هم فنتزيه قیله باشلهیدی.
البته، قورقیش طبيعی حال. بیراق، بو کتّهلر نینگ مزاح قیلیشی یاکه «باله کتّه بولسه قورقیشی اوز- اوزیدن یوق بولیب کیتهدی»، دییه بی پروا بولیشیگه اساس بولالمهیدی. نیگهکه باله نینگ قارانغودن قورقیشی اونگه سلبی تأثیر کورسهتیشی ممکن.
بالهکهی قارانغولیکدن قورقمهیدی، بلکه او ییرده قندهی دیر قورقینچلی شرفهلر تورگندیک حسیات اونی واهمهگه سالهدی. بو نینگ اوچون انه شو شرفه نیمه ایکنلیگینی انیقلشتیریش لازم. اونی واهمهگه سالهیاتگن یلمانغیز کمپیر، کولنکه یاکه باشقه نرسهنینگ سورهتینی چیزیشینگیز، پیلستیلیندن یهسهشینگیز کیرهک. اونینگ خَیالیدهگی سیما تیار بولگچ، یسهلگن، چیزیلگن قورقینچلی مخلوققه سیکین – استه تورلی کولگیلی، اوخشاوسیز یاکه مفتونکار دیتهللر قوشیب بارینگ.
مثلاً، دهشتلی چیزیلگن کوچوک نینگ بیر قولاغی تیکّه، ایکّینچیسی شلپهیتیریلسه، جونلری جینگهلک قیلینسه، آغزی کولیب تورسه، دُمی گجک قیلینسه اونینگ قورقینچلی تامانی یوقالهدی.
کیینگی باسقیچده دهشتلی مخلوق چیزیلگن صورتنی ییرتیب تشلش یاکه غیجیملش، پیلستیلیندن یهسهلگن بولسه آیاق بیلن تیپکیلش و بقیریب: «یوقال، مین سیندن قورقمهیمن» دیگن سوزلر ایتیلهدی.
مخلوق بیلن شوندهی «جنگ» بالهنگیز اوخلشدن آلدین ایمس، بلکه کوندوز کونی عملگه آشیریلهدی. کیچهسی باله اوخلشگه یاتیشیدن آلدین سیکینگینه اونگه بوگونگی قهرمانلیگینی ایسلهتیب: «انقونی راسه باپلهدیک -ه! ایندی او باشقه کیلمهیدی، چونکی اونی مجقلب تشلهدیک»، دییش ممکن.
باله بیلن اوینهیاتگنده اونی قورقمس، باتیر کیشی رولیگه کیریتیش لازم. گویا او یاش بالهلر، موشوکلر یاکه اویینچاقلری نینگ حمایهچیسی دیگن تصور اویغاتیش ضرور. امکان توغیلیشی بیلن تنیشلر، قرینداشلرگه فرزندینگیز نینگ باتیرلیگی، قورمسلیگی توغریسیده گپیریب بیریش کیرهک.
بالهنی قارانغولیکده اوخلشگه مجبور قیلمسلیک ضرور. اگر او ایستهسه چیراقنی اوچیریب، ایستهمسه یاقیب اوخلهسین. عمومن بالهگه اوزی یشهب تورگن جاینینگ خوجهینی بولیشگه امکان یرهتیش لازم. اونینگ تختیگه قول چیراغی قوییب قوییش هم اینگ مقبول ایشدیر.
کیچکینتاینی بیر خیل ترتیب – قاعدهگه اورگهتیش لازم. هر کونی بیر وقت ده اورنیگه یاتقیزینگ، ایرتکلر ایتیب بیرینگ. شوندهی عادتگه اورگهتیش بالهنینگ خاطرجمع و ایشانچلی بولیب اوسیشیگه ایجابی تأثیر کورسهتهدی.
دایما قووناق یشهشگه حرکت قیلینگ. یخشی کیفیت قورقوو نینگ آلدینی آلیشی اوچون قیلینگن سعی –حرکتلر اوز نشانهسینی بیرهدی. کتّهلر حیاتیده روی بیرهدیگن برچه جدّی معمالر خفهگرچیلیک آنلریدن درحال آشیب اوتیب، هزللشیشگه، تیز- تیز کولیشگه، کیچکینتایلرینگیز بیلن علاجی باریچه بیرگه بولیشگه حرکت قیلینگ.
کیچکینتایگه تورلی خیل اویینلر، قووناقلیک بخش ایتهدیگن آنلر سوو و هوادیک ضرور ایکنلیگینی اونوتمنگ. بالهلریمیز گودکلیگیدن قورقوو حسسی بیلن وایهگه ییتمسین. جسور و مرد بولیب کتّه بولسین.
