کابل مکتب‌لری‌نینگ اوقووچیلری و اولرنینگ عایله‌لری، مکتب‌لرده درسی کتاب و معلومات یوقلیگی‌دن شکایت قیله‌دیلر. اولرنینگ ایتیشیچه، مجبوریت‌دن برچه کتاب‌لرینی بازاردن ساتیب آله‌دیلر.
اوشبو عایله‌لرنینگ ایتیشیچه، قانون اساسیده، مکتب دورانی‌ده اورگه‌نیش برچه اوچون پول سیز دیر، بیراق اولر اقتصادی وضعیت یمان بولگن بیر شرایط‌ده اوقووچیلرنینگ برچه نیازلرینی بازاردن تیارلش‌گه مجبور بوله‌دیلر.
اوقووچیلردن بیری‌نی آته‌سی حمیدالله نینگ ایتیشیچه، قضیه نیمه بولگنینی بیلمه‌یدی؛ لیکن کتاب‌لر مکتب آرقه‌لی پول سیز اوقووچیلرگه ترقه‌تیلیش اورنی‌ده، بازارلرده ساتیله‌دی.
سلام‌وطندارگه صحبت بیرگن کابل شهری‌نینگ جوی‌شیر بازاریده کتاب ساته‌دیگن نعمت‌الله نوری، بو ادعالرنی تصدیق‌له‌یدی. اونینگ ایتیشیچه، کونده 20 دن 500 جلد درسی کتاب ساته‌دی؛ لیکن بو کتاب‌لر جوده هم کیفیت سیز دیر.
معارف وزیرلیگی‌نینگ نشرات بولیمی باشلیغی کبیر حقمل‌نینگ ایتیشیچه، درسی کتاب‌لر باستیریلیب چیقاریلیشی و ترقه‌تیلیشی‌ده معارف وزیرلیگی ایشلاوچیلری‌نینگ قولی بولمه‌گن صورتده، برچه اوچون بو کتاب‌لرنی باستیریب چیقاریش و ترقه‌تیش ایرکین دیر.
معارف وزیرلیگی رسمی‌لریگه کوره، اوشبو وزیرلیک مکتب‌لر اوچون 49 میلیون جلد دن آرتیق درسی کتاب تیارلگن و بولر باستیریلیب چیقاریلگن صورتده، اوقووچیلرنینگ کوپینچه قیین‌چیلیک‌لری حل ایتیله‌دی.
