بوگون «پنج‌شنبه» کابل‌ده خبری بیر ییغین اوتکزگن کابل پولیس قومندانلیگی مسؤوللری‌نینگ ایتیشیچه، سونگی آیلرده جنایتچی‌لر قولگه آلینیشی، بنگی‌وار ماده بنگی‌لری توپله‌نیشی، پارتلاوچی ماده‌لر کشف ایتیلیب اوچریلیشی و مخدره ماده ییغیلیشی نتیجه‌سیده کابل شهریده جنایی جرملر میزانی 50% کمه‌یگن.
کابل پولیس قومندانلیگی مسؤوللری تامانیدن میدیالرگه بیریلگن گزارش اساسیده، اوتگن بیر آیده تورلی جنایی جرملرگه عیب‌لنگن 285 کیشی قولگه آلینگن و بو جمله‌دن 9 باله و 2 عیال شامل 124 ته‌سی باش قاره‌لاوچیلیک‌که تانیشتیریلگن.
کابل شهری آسمایی 101 زون قومندانی مل پاسوال محمدداوود امین‌نینگ ایتیشیچه، اوتگن بیر آیده مخدره ماده گه قرشی کوره‌ش خصوصیده، اولر 116 ایرکین و قوشمه عملیات اوتکزگن و نتیجه‌ده چمه‌سی 2000 بنگی توپله‌نیب و کسلخانه‌لرگه یوباریلگن.
آسمایی 101 زون قومندانی گه کوره، اهالی اذیتی گه سبب بولگن 200 کیشی هم قولگه آلینگن و ضمانت قیلینگنیدن سونگ، قوییب یوباریلگن‌لر و بو موضوع هم کابل شهریده جرملر میزانی کمه‌ییشی گه سبب بولگن.
بیراق، کابل یشاوچیلریدن بیرقطاری، بو موضوع نی شبهه‌لی بیلیب ایتیشیچه، شهرده جنایی جرملر میزانی کَم بولمه‌گن.
وزیرآباد چهارقلعه یشاوچیلریدن بیری محمد جبارنینگ ایتیشیچه، منطقه‌لریده پولیس حضوری کم دیر و کیچه ساعت 10-12 دن سونگ، اوغیرلاوچیلیک باشلنه‌دی. اونگه کوره، اوغیرلاوچیلر اهالی‌نینگ پولی و تلیفونلرینی اوغیرله‌یدیلر.
کابل یشاوچیلریدن باشقه بیری نعمان‌نینگ ایتیشیچه، کابل شهری‌نینگ خوفسیزلیگی کونسایین یمانراق بوله‌دی و ناتینچلیک‌لرنی عاملی اقتصادی قیین‌چیلیک‌لر دیر.
یشاوچیلر هردایم مملکت پولیس کوچلری اینیقسه کابل پولیسی‌دن تنقید قیلیب ایتیشیچه، ایریم موضوعلرده پولیس‌لرنینگ اوزلری جنایت‌گه قول اوره‌دیلر؛ بو ادعالر هردایم ایچکی ایشلر وزیرلیگی مسؤوللری تامانیدن رد ایتیلگن.
کابل پولیسی‌نینگ یوتوقلری توغریسیده‌گی گزارش‌لر، نیچه وقت آلدین پولیس ایشلری یخشی‌لنیشی خصوصیده، کابل شهری‌نینگ حوزه‌لریده ایچکی ایشلر وزیرلیگی تامانیدن اوزگریش کیریتیلگن بیرچاغده ترقه‌تیلگن.
