محرم درانی باشقه‌لردن اوستون ایمس ایدی؛ بوگونکی قانلی واقعه‌ده جان بیرگن‌لر و هر کون جان بیره‌دیگن‌لردن اوستون کورینمه‌دی. بیراق بیزلرنینگ اوندن ایستده‌لیک‌لریمیز بار ایدی. بیزلرنینگ آره‌میزده اورین توتگن ایدی؛ فکریمیز و حیاتیمیزده ایدی. اوندن بولگن ایستده‌لیک بیزلر اوچون تویغو و معناگه ایگه ایدی.
«حیات قیسقه دیر»؛ بو سوز دایما تیلی‌ده ایدی. اونینگ ایتیشیچه، قیسقه حیات اوچون سوزلرنی کته قیلماقده ارزیمه‌یدی. قیین‌چیلیک‌لرنی کته کوریب و قتیق توتماق لازم ایمس دیر. هر کون ایرته‌لب مایک‌نی آرقه‌سیده اولتیرگن چاغیده اهالی بیلن تینچلیک، اورتاقلیک، جوشقین، باله‌لیک کولگو و تنیق یوره‌ک بیلن صحبت قیلردی.
ایمان، ایشانچ و شخصیت برقرارلیگی‌دن سوز یوریتیب یاشلر و اوسمیرلرنی کیله‌جک‌لری اوچون آیدینلش‌گه ترغیب ایتردی. اخلاق استادی بولیب و هردایم اوزی‌نینگ باشقه‌لردن اوستون کورمس‌دی؛ شو یوزه‌دن هردایم بو سوزنی تکرار قیلردی: «می‌نینگ فکریمچه».
شونده‌ی بولگنی اوچون برچه «تانگ سروری» گه علاقه قوردیلر و مملکت‌نینگ هر بیر چیکه‌سیدن قونغیراق قیلیب و محرم بیلن صحبت قیلردیلر.
«نگاه نو» برنامه‌سینی هیچ قچان کم توتمه‌دی. بو برنامه اوچون جانی دن اورنک قوییب و سلام وطندار بیلن بولگن زمانی‌گه قدر برنامه‌ده اصلاحات و خلاقیت‌دن سوزله‌دی.
محرم کمیده ایکی ییل سلام‌وطندار کاروانی بیلن بیرگه ایدی. او، بوگون کابل‌ده یوز بیرگن قانلی واقعه‌ده جان بیریب و تینگریسی‌گه قاووشدی. سلام‌وطندار اوشبو سیوگیلی و مجرب نطاق و برنامه تیارلاوچی‌نی هیچ قچان ایس‌دن چیقارمه‌یدی.
سلام‌افغانستان میدیایی ترماغی، بو همراه و سنگردارنینگ شهادتی‌نی افغانستان تینچ خلقی، مملکت میدیا جماعه‌سی اینیقسه شهید خانم درانی‌نینگ عایله اعضاسیگه تسلیت ایته‌دی.
توغری دیر کیم بیزلر تینگریدن میز و اونگه قیته‌میز.
