ایرکین واحدوف وفاتی بیلن اوزبیک ادبیاتی و شعریتی نینگ بیر اولکن چناری قوله‌دی و جبران قیلیب بولمی‌دیگن بیر ضایعه یوز بیردی. اونینگ ایجادی یوکسک انسانی فکرلر، ایرکین‌لیک و عدالت‌گه اینتیلیش تویغولری، جوده نفیس لیریک تخیل و تصورلر، ایزگولیک و گوزه‌ل لیککه مشتاق‌لیک غایه‌لری بیلن یوغیریلگن.
اوزبیکستان بیلیم یورتی اوقیتوچیسی پروفیسور دکتور عبدالحکیم شرعی جوزجانی نینگ ایرکین واحدوف فعالیتی و حیاتی حقیده ایتیشلریچه: «ایرکین واحدوف – عصیانکار شاعر ایدی. او آدملرنی منقورتلیک سرقیتلری و روحی اسارت کورینیشلری‌گه قرشی کوره‌شگه سفربر قیلیب، کونگل‌لرده ملی غرور و پارلاق اوتمیش‌گه ایشانچ اویغاتردی.»
جوزجانی جنابلری نینگ معلوم قیلیشیچه، ایرکین واحدوف حماسه یره توچی شاعر، دراماتور، افغانستان شناس و جماعت اربابی بولگن. او میلادی 1963ییل 28 دسمبرده، اوزبیکستان نینگ فرغانه ولایتی آلتی اریق تومنیده توغیلگن.
بوندن کوپ ییللر مقدّم، اوزبیک ملتی نینگ غروری، ملی اوزلیگینی اولدیریش و اونینگ مدنی یادکارلیکلرینی یوقاتیش‌گه قره‌تیلگن شوراویلر توزومی تامانیدن آلیب باریله یاتگن استعمارچیلیک سیاستی اوج آلگن بیر پیتده، ایرکین واحدوف نینگ عروض وزنیده یازیلگن «اوزبیگیم» ناملی حماسی شعری، تاریخ نداسی سینگری نه فقط اوزبیکستان حدودیده، بلکه برچه اوزبیک‌لر یه‌شیدیگن اولکه لرده کینگ کولم‌ده ینگره‌ب کیتدی وکوپ ییللر حکم سوریب کیلگن آغیر سکوتنی سیندیریب، آز وقت ایچیده اوزبیک خلقی نینگ ملی حماسه سیگه ایلندی.
دوکتور جوزجانیگه کوره، اوشبو شعرنینگ قیلیچ‌دیک اوتکیر سوزلری، هر بیر یاپیق کونگیل ایشیگینی آچیب کیریش‌گه قادر بولگن مضمونی تگیده نیمه‌لر یاتردی، اونینگ جاذبه لی عباره‌لریده قنده‌ی سحرلی کوچ موجود ایدی؟
اوزبیکستان شناس و یازووچی عزیزالله ارال نینگ معلوم قیلیشیچه، ایرکین واحدوف حماسه یره تووچی شاعر بولگن‌لیگی اوچون اوزبیک‌لر شاعری دیب تانیلگن.
او، قورقمسدن جرعت بیلن باشقه‌لر قطغن بولیب یورگنده اوزبیکلرنی کوک‌لرده کوترگن و اوزبیکنی بوتون دنیاگه تانیتگن. ایرکین واحدوف شعرلریده اولوس نینگ یشیرین درد – الملری نینگ انعکاسی، حاکم تیزیم ایسته‌کلری‌گه مغرور خلق نینگ رد جوابی ایدی.
جناب ارال نینگ معلوم قیلیشیچه، ایرکین واحدوفنی باشقه اوزبیک شاعرلریدن بیته فرقی بولگن. او، افغانستان اوزبیکلرینی ایسیدن چیقارمه‌ی شعرلریده افغان اوزبیکلرینی نظرده توتیب، افغان دیاری، افغان شاعری دیگن گپ‌لرنی قید ایتگن.
اونگه کوره، ایرکین واحدوف 3 دورده حیات کیچیرگن اوزبیک شاعرلریدن بیری بولیب، نهایتده کوچلی اوزبیک شاعرلریدن بیری دیر. او، تبعید دوری یشب ایجاد ایتیب یورگن شاعری بولسه هم مستقل‌لیک شاعری بولیب، استقلالیتینی طلب قیلگن.
ایرکین واحدوف نینگ اوزبیگیم ناملی قصیده‌سی بیلن اوزی و اوزبیکلرنی دنیاگه تانیتگن. او میلادی1987 ییل اوزبیکستان خلق شاعری، 1999 ییل اوزبیکستان قهرمانی دیب آلقیش‌لنگن.1997 ده حمزه ناملی اوزبیکستان مکافاتینی آلگن، 1983 ده دولت لاوری مکافاتیگه صاحب بولگن.
واحدوف 80 ییل عمر کوریب اوزیدن اونلرچه اثر خلق قیلگن و اوزبیک تیل و ادبیاتی آسمانیده یشنه‌گن پارلاق یولدوز، علاج سیز کسل‌لیککه یولیقیب 30 می فانی دنیا دن کوز ابدیتگه باغلندی.
