اوتگن کون «سهشنبه» کیچ پیت کابل شهریدهگی اورانوس هوتلیده اسلام پیامبری میلادی مناسبتی بیلن یولگه قوییلگن خودکش هجومده کوپینچه عایلهلرنینگ اویلریده قیغو و الم گلیمی یازیلدی.
مذکور هجومده یرهلنگنلرنینگ عایله اعضالری، یاش و کیکسه، ایرکک و عیال بوگون کابل ایمرجنسی کسلخانهسینینگ اونگیده عایله اعضالرینی کوریش اوچون کوتیب تورگنلر؛ بیراق کورینیشچه، کسلخانه مسؤوللری اولر اوچون کیریش گه رخصت بیرمهیدیلر.
اوشبو کیشیلردن یالغیز بیرقطاری، اوزاق دن کسللرینی کوریش گه مؤفق بولگنلر و باشقه بیرقطاری، حاضرگچه کسللرینی کوره آلمهگن.
لوگر یشاوچیسی وحیدالله شیرانینینگ ایتیشیچه، تاغهسی انجنیر و بیر خصوصی ادارهنینگ مسؤولی بولیب و اوتگن کیچه یولگه قوییلگن ییغین گه چقیریلگن ایکن و حاضر یرهلنگنلرنینگ آرهسیده دیر.
شیرانی گه کوره، اوزی تاغهسینی کوره آلمهگن؛ بیراق داکترلر هم تاغهسینینگ ساغلیک وضعیتیدن دقیق معلومات بیرمهیدی.
شونینگدیک، بغلان یشاوچیسی محمد، یرهلنگن جیینینی کوریش اوچون ایمرجنسی کسلخانه سیگه کیلگن؛ اونینگ ایتیشیچه، بوندهی هجوملر ریجهلنیب و عملگه آشیریلیشی انسانیت و اسلامیتدن اوزاق دیر.
محمدنینگ ایتیشیچه، 22 یاشر جیینی ایکی فرزندنینگ آتهسی دیر و حاضر یرهلرینی دارولش اوچون بو کسلخانهده یاتقیزیلگن.
اوشبو واقعه قربانلرینینگ رقمی انتقال بیریلگن کسلخانهلرده قیستیریلگن؛ بیراق قطار کیشیلر حاضرگچه عایله اعضالرینی تاپهآلمهگن.
کیکسه بیر کیشی اوتگن کیچهدن بویان اوغلینی آخترهدی؛ بیراق حاضرگچه اوندن هیچ بیر معلومات قولگه کیریتمهگن.
بو کیکسه کیشی خبرچی بیلن صحبت اوتکزیش گه هم قیزیقمهیدی، داکترلردن بیری بیلن قیلگن صحبتیده اوغلیمنینگ تیریک یا-ده اولیمینی اورگنماقچی من دییدی.
اوشبو واقعه یرهدارلریدن بیری روحالله 15 یاشیده دیر و بو یاش باله شیخ زاهد کسلخانهسیده یاتقیزیلگن. اونینگ ایتیشیچه، یوز بیرگن واقعهده 3 اورتاغینی قولدن بیرگن.
شیخ زاهد کسلخانهسی، اورانوس هوتلی گه یقین بولگن کسلخانهلردن بیری دیر و اوتگن کیچه یوز بیرگن واقعهده هلاک ایتیلگنلر و یرهلنگنلردن کوپینچهسی بو کسلخانهگه انتقال بیریلگن.
مذکور کسلخانه باشلیغی داکتر وحدت الکوزینینگ ایتیشیچه، کمیده 50 کیشی بو کسلخانه گه انتقال بیریلگن و اولردن 11 تهسی جان بیرگنلر.
ساغلیقنی سقلش وزیرلیگی، اوتگن کیچه یوز بیرگن واقعهده یالغیز 55 کیشی هلاک ایتیلگنینی تصدیقلیدی؛ بیراق واقعه گواهلردن بیری سمیعالله نینگ ایتیشیچه، اوز کوزی بیلن طب عدلیده 67 جنازهنی کورگن.
دوستلرینی آختریب برچه کسلخانهلرگه باش اورگن سمیع نینگ کوپهیتیریشیچه، اوشبو واقعهده هلاک ایتیلگنلر و یرهلنگنلرنینگ رقمی دولت تامانیدن اعلان ایتیلگن رقمدن آرتیق دیر.
ساغلیقنی سقلش وزیرلیگی تامانیدن اعلان ایتیلگن سونگی رقم اساسیده، اوتگن کیچه یوز بیرگن خودکش هجومده 55 کیشی هلاک و باشقه 94 کیشی یرهلنگن.
اوتگن کیچه یوز بیرگن خودکش هجوم مسؤولیتینی حاضرگچه هیچ بیر کیشی یا-ده گروه بوینیگه آلمهگن و قوراللی طالبلر هم بیر اعلامیه صادر قیلیب بو هجومنی قارهلگن.
