بوندن چمه‌سی ایکّی هفته آلدین 21 – اپریل‌ده پایتخت کابل‌ده بویوک متفکر شاعر و دولت اربابی امیر الکلام علی‌شیر نوایی تولدی نینگ 575 ییل‌لیگی‌گه بغیشلب خلق ارا سیمپوزیوم‌نینگ آچیلیش مراسمی اوتکزیلگن ایدی.
جمهور رییس‌لیک سرایی‌نینگ سلامخانه قصری‌ده اوتکزیلگن اوشبو اولکن ییغین‌ده چیقیش قیلگن جمهور رییس دوکتور محمد اشرف‌غنی امیر علی‌شیر نوایی‌نینگ شخصیتی و شرق تمدنی‌نینگ پارلاق سیمالری‌دن بیری بولگنی‌نی تیل‌گه آلدی.
او اوتمیش‌ده نوایی اثرلری همده اونینگ دوری اورگنیلمه‌گنی‌نی بیلدیریب، افغانستان‌ده نوایی آتی و خاطره‌سی‌نی ابدی لشتیریش اوچون نوایی دولت مدالی ضرب ایتیلیشی‌نی اعلان ایتگن ایدی. اوشبو خلق ارا سیمپوزیوم مثلی کوریلمه‌گن درجه‌ده طنطنه‌لی طرزده اوتکزیلگنی اعتراف ایتیلماقده.
افغانستان رهبری‌نینگ امیر علی‌شیرنوایی‌نینگ دولت مدالی ضرب ایتیلیشی بارهسیدهگی اعلانی هم مذکور ییغین صلابتی‌نی ینه – ده آشیردی. حقیقتاً نوایی کبی بویوک شخصیت افغانستان دولتی تامانیدن هر قنده‌ی اعزاز و اکرام گه لایق شخصیت حسابلنه‌دی.
علی‌شیر نوایی بوتون بشریت‌گه قره‌شلی بویوک علمی، عرفانی و سیاسی شخصیت بولیشی‌گه قره‌مه‌ی او بیرینچی‌دن افغانستان دولتی و مملکتی‌گه تیگیشلی. چون‌که نظام الدین علی‌شیر نوایی بوندن 575 ییل آلدین یعنی میلادی 1441 ییلی‌نینگ 9- فبروری آییده هرات‌ده دنیا گه کیلگن.
او ییرده اولغه‌ییب وایه‌گه ییتگن. تیموری شهزاده‌لردن سلطان حسین میرزا بایقرا دولتی‌نی باشقریش‌ده یقین‌دن یاردم کورستگن و انه شو زمین‌ده اوزی‌نینگ بی بها معنوی اثرلری نی ایجاد ایتگن. حاضرگی کون‌ده نوایی‌نینگ مزاری هم هرات شهری‌نینگ مصلا منطقه‌سی‌ده جایلشگن.
افغانستان دولت‌لری اوتمیش‌ده نه فقط نوایی بلکه تیمور لر و تورکی خلق‌لرگه تیگیشلی مدنیت بیلن یخشی مناسبت‌ده بولمه‌گن‌لر. بونگه اولرنینگ کور تعصب‌لری سبب بولگن. علم‌گه، تاریخ‌گه و مدنیت‌گه قرشی دشمن‌لیک و تعصب جهالت‌دن باشقه نرسه ایمس البته.
دوکتور محمد اشرف‌غنی‌نینگ علی‌شیرنوایی و تیموری‌لر دوری مدنیتی بارهسیدهگی اعتراف‌لری اونینگ بیلمدان‌لیگی و تاریخ‌دن یخشی خبردار شخص و عین‌حال‌ده، بیشیق سیاستچی بولگن لیگی‌دن دَرک بیره‌دی.
غنی امیر علی‌شیر نوایی خلق ارا سیمپوزیومی‌نی اوتکزیلیشی باره‌سی‌ده عمل‌گه آشیرگن همکارلیگی بیلن نه فقط علی‌شیر نوایی روحی‌نی شاد ایتگن بولدی، بلکه نوای‌نینگ افغانستان، منطقه، دنیاده‌گی میلیون‌لب اخلاصمند‌لری‌نی کونگلی‌نی آوله‌دی.
امیر علی‌شیر نوایی دولت مدالی اله‌قچان افغانستان‌ده ضرب ایتیلیشی کیره‌ک ایدی. اوشبو مدال ضرب ایتیلر ایکن اونی تیل و ادبیات، فرهنگ، هنرمندچیلیک رواجی اوچون محنت قیلیب مهم یوتوق‌لر گه ایریشگن افغانستانلیک همده چیت ایل‌لیک شخصیت‌لرگه تقدیم ایتیش ضرور.
شونینگ‌دیک علی‌شیر نوایی دولت مدالی نوایی انسان‌سیور، عدالت‌پرور انسان بولگنی اوچون اجتماعی عدالت تامین له‌نیشی و انسان حق‌لری ساحه‌سی‌ده فعالیت آلیب بارگن کیشی‌لر‌گه بیریلیشی لازم. نوایی یخشی سیاستچی و عدالت‌لی دولت اربابی بولگنی اوچون اونینگ آتی‌ده‌گی دولت مدالی یخشی حکومت دارلیک‌نی تیکلش بوییچه فعالیت آلیب بارگن مستحق شخص‌لرگه تاپشیریلیشی‌نی تکلیف ایته‌من.
افغانستان دولتی‌دن جمهور رییس محمد اشرف‌غنی‌نینگ امیر علی‌شیر نوایی دولت مدالی‌نی ضرب ایتیشی باره‌سی‌ده بیرگن وعده‌سی نی تیز آره ده عمل‌گه آشیریشی‌نی سوره‌گن حالده، اوزاق ییل‌لر اونوتیلگن و بی مهرلیک بیلن یانده شیلگن امیر علی‌شیر نوایی‌نی حقی‌نی امکان قدر ادا ایتیش اوچون نوایی سیمپوزیومی‌نینگ سونگی کونی‌ده نوایی مقبره‌سی یانی‌ده اعلان ایتیلگن قطعنامه‌گه کیلتیریلگن موضوع‌لرنی بیر مه بیر عمل‌گه آشیریش سَری عملی قدملر تشلش‌لری ضرورلیگی‌نی ایسلته‌من.
اوشبو قطعنامه‌ده امیر علی‌شیر نوایی مقبره‌سی نی یخشی بیر شکل‌ده آبادانلشتیریش، نوایی نامی‌نی منگو قالدیریش اوچون اونینگ مبارک آتی‌گه قطار علمی مرکزلر، عالی اوقوو یورتلری همده تورلی مهم جای‌لر جمله‌دن هرات قونلغه‌سی‌نی اَتش کبی مساله‌لر اورته‌گه قوییلگن ایدی.
قطعنامه‌ده شونینگ‌دیک، علی‌شیر نوایی اثرلری‌نینگ تولیق متنی نشر ایتیلیب اوز خواننده‌لری قولی‌گه ییتکزیلیشی هم قید ایتیلگن. قطعنامه‌ده‌گی موضوع‌لرنی بیرین کیتین عمل‌گه آشیریش اوچون نوایی فرهنگی انجمنی قیته تیکلنیشی ضرورتی اوستی‌ده هم تاکید لنگن.
نوایی انجمنی تیکلنیب قیته فعالیت‌گه باشلشی بیلن نه فقط علی‌شیر نوایی اثرلری‌نی چاپ ایتیش اوچون امکانلر پیدا بوله‌دی بلکه افغانستان اوزبیک‌لری معنوی حیاتی‌نی یوکسلتیریش اوچون هم عملی قدملر تشلنه‌دی. نوایی انجمنی‌نی قیته تیکلش دولت‌نینگ ایشی بولمه‌گنی هیچ کیم‌گه سیر ایمس.
اوشبو انجمن‌نی ینه بیر بار یخشی و سیر محصول بیر شکل‌ده فعالیت باشلشی اوچون بیرینچی‌دن اوزبیک ضیالی‌لر، فرهنگسیور انسان‌لر، شاعرلر و ادیب‌لر اوز ارا همکارلیک‌ده عملی قدملر تشلش‌لری گه جدی احتیاج سیزیله‌دی. عین حالده دولت ایچکریسی‌ده سیاسی امکانلرگه ایگه بولگن شخص‌لر قاله بیرسه اوزبیک خلقی‌نینگ بای به دولت شخص‌لری اوشبو انجمن هر تامانلمه حمایت ایتیش‌لری اساسی احتیاج‌لردن سنه له‌دی.
