مملکت‌ده ناتینچلیک‌لر کینگه‌یگنی و اوروش کونسایین کوپه‌ییشی و اینیقسه غزنی و کابل‌ده یوز بیرگن سونگی واقعه‌لر باعث، بوگون نماینده‌لر کینگشی‌نینگ اعضالری، امنیتی اداره‌لرنینگ مسؤوللرینی جواب بیریش‌لری اوچون کینگش‌گه چقیرگن‌لر. بیراق، ملی مدافعه و ایچکی ایشلر وزیرلری و ملی خوفسیزلیک باشلیغی کینگش‌ده حاضر بولمه‌ی و بیر مکتوب یوللب محرم آیی اوچون امنیتی تدبیر آلیش ایشلری بیلن مشغول بولگن‌لرینی بیلدیرگن‌لر.
امنیتی اداره‌لرنینگ مسؤوللری کینگش‌ده حاضر بولمه‌گن‌لری، نماینده‌لر کینگشی اعضالری‌نینگ جدی عکس‌العملی گه روپه‌ره بولگن.
نماینده‌لر کینگشی اعضاسی محمداقبال صافی‌نینگ ایتیشیچه، امنیتی اداره‌لرنینگ مسؤوللرینی مسؤولیت‌سیزلیگی و بی‌فرق یانده‌شیش‌لری سبب، غزنی شهری سقوط عرفه‌سیده قرار تاپیب و باشقه ولایت‌لرده ناتینچلیک‌لر کوپه‌یگن.
جناب صافی گه کوره، کونده افغانستان‌نینگ ایریم ولایت‌لریده اونلرچه عسکر هلاک ایتیله‌دی و بو یاشلرنینگ قانی گه حرمت قایل بولیش اوچون امنیتی اداره‌لرنینگ مسؤوللری استیضاح ایتیلیشی کیره‌ک.
نماینده‌لر کینگشی اعضالریدن باشقه بیری علی‌اکبر قاسمی‌نینگ ایتیشیچه، امنیتی مسؤوللر استیضاح ایتیلیشی یا-ده اورین‌لری اوزگرتیریلگنده مملکت‌نینگ حاضرگی وضعیتی گه هیچ قنده‌ی اوزگریش کیلمه‌یدی. او، مملکت‌نی حاضرگی شرایطی‌دن تنقید قیلیب ایتیشیچه، ملی بیرلیک حکومتی اوتگن 4 ییل جریانیده هیچ بیر بولیم ده ییترلیچه یوتوق قولگه کیریته آلمه‌گن.
شونینگدیک، نماینده‌لر کینگشی‌نینگ باشقه بیر اعضاسی شکیبا هاشمی، امنیتی اداره‌لرنینگ مسؤوللرینی مکتوبی‌دن تنقید قیلیب ایتیشیچه، افغانستان‌نینگ هر بیر کونی محرم دیر؛ چونکه کونده اونلرچه عسکر و یاش هلاک ایتیلیب و توپراققه تاپشیریله‌دی.
