مسئولان وزارت صحت عامه و ادارۀ تنظیم خدمات مخابراتی افغانستان (اترا)، امروز قرارداد دسترسی شفاخانه‌های مرکزی پکتیکا و سمنگان به خدمات بهداشتی از راه دور را امضا کردند.
فیروزالدین فیروز وزیر صحت عامه می‌گوید، امضای قرارداد وصل شفاخانه‌های ولایتی به شفاخانه‌های مرکز ادامه دارد و در آینده شفاخانه‌های ولسوالی‌های دوردست نیز شامل این روند خواهند شد. به گفتۀ وزیر صحت عامه، این کار پزشکان شفاخانه‌های ولایتی را قادر می‌سازد تا ضمن آشنایی با فناوری‌های پیشرفته، بیماران را از راه دور و با مشورۀ پزشکان شفاخانه‌های پایتخت درمان کنند.
محمدنجیب عزیزی رئیس اترا نیز می‌گوید، تا پایان سال 2019 میلادی شفاخانه‌های ولایتی 15 ولایت کشور برای دسترسی به خدمات بهداشتی به شفاخانه‌های مرکز وصل می‌شوند.
براساس گفته‌های مسئولان وزارت صحت عامه، وصل شفاخانه‌های مرکزی پکتیکا و سمنگان به کابل 3 میلیون دالر هزینه برمی‌دارد که از سوی ادارۀ تنظیم خدمات مخابراتی افغانستان پرداخت می‌شود.
