د امریکا د بهرنیو چارو وزارت او افغان حکومت په افغانستان کې د خپلو ملکي مرستو د ارزونې خبر ورکړی دی.
د امریکا د بهرنیو چارو وزارت په یوه خبرپاڼه کې ویلي چې دا ارزونې د ولسمشر اشرف غني په غوښتنه او د امریکا په تایید کېږي او موخه یې له افغانستان سره د امریکا د سټراټېژیکو مرستو ارزونه ده.
په خبرپاڼه کې لیکل شوي: «د دې ارزونې له مخې به په افغانستان کې د له روڼتیا، ځوابورکونې او په لومړیتوبونو د ملکي مرستو وېش، د افغانستان د ملي بنسټونو پیاوړتیا او د افغانانو د هوساینې ملاتړ کېږي او دواړه لوري به هوکړه وکړي چې د امریکا ملکي مرستې باید د افغانانو د ملاتړ او د افغانستان پر ځان بسیاینې لپاره دوام وکړي.»
په یاده خبرپاڼه کې زیاته شوې چې په افغانستان کې د امریکا پانګونه به د نړیوالې ټولنې د هڅو په چوکاټ کې د افغانستان د اقتصادي هوساینې د ملاتړ لپاره کېږي.
د سیګار د وروستي راپور له مخې، امریکا له ۲۰۰۲ میلادي کال راهیسې د افغانستان په نظامي او ملکي برخو کې له ۹۰۰ میلیارډ ډالرو ډېرې پیسې لګولې دي.
ټاکل شوې دا ارزونه د ۲۰۱۹ کال د مې میاشتې تر پایه وشي.
د یادونې ده چې امریکا د افغانستان تر ټولو ستر مالي ملاتړی هېواد دی چې په نظامي، روغتیا، پوهنې، اقتصادي پرمختیا، زېربناوو او د تاریخي او فرهنګي اثارو ساتلو برخه کې له افغان حکومت سره مرسته کوي.
