د افغانستان د فوټبال ملي لوبډلې نن (دوشنبه) د جنوبي اسیا (ساف) په سیالیو کې د مالدیف فوټبال لوبډلې ته هم ماته ورکړه او په خپل ګروپ کې پورته لاړ.
دغه لوبې چې یوه اونۍ وړاندې په هند کې پیل شوي؛ د جنوبي اسیا ۷ هېوادونه په کې ګډون لري.
افغانستان او مالدیف د لوبې په لومړۍ نیمايي کې ډېره محتاطانه لوبه وکړه، خو په شلمه دقیقه کې د افغانستان د فوټبال ملي لوبډلې لوبډل مشر فیصل شایسته لومړی ګول او ۱۰ دقیقې وروسته امید بارکزي د افغانستان له پاره دویم ګول ووهلو.
خو په همدې جریان کې په ۳۸مه دقیقه کې مالدیف پر افغانستان خپل لومړی ګول جوړ کړ.
افغان لوبډلو د لوبې په دویمه نیمايي کې ښه لوبه وکړه او دوه نور ګولونه یې هم ووهل، امید پوپلزی هغه افغان فوټبال لوبغاړی و، چې د لوبې درېیم او خپل دویم ګول یې هم ترسره کړ او احمد ارش د افغان لوبډلې څلورم ګول د لوبې په ګټه تمام کړو.
افغانستان له دې وړاندې له بنګله دېش او برما نه هم لوبې ګټلې وې او له مالدیف فوټبال لوبډلې نه د لوبې په ګټلو سره ښايي په خپل (ب) ګروپ کې لومړی ځای وګټي. ټاکل شوې ده، چې افغانستان به په نیمه پای لوبه کې د چهارشنبې پر ورځ د سریلانکا له فوټبال لوبډلې سره مخامخ شي.
