د هرات د عامې روغتيا رياست مسوولان وايي، په دې ولايت کې دويم کس چې پر کورونا اخته و، روغ شوی دی.
د ياد ولايت د عامې روغتيا رييس عبدالحکیم تمنا وايي، له قرنطين وروسته د ياد روغ شوي ۶۵ کلن سړي درېيمه ازموينه منفي وه او له روغتون نه کور ته ولېږل شو.
له دې وړاندې هم يو کس په هرات او يو کس هم چې په دايکندي کې پر کورونا اخته و، روغ شوي وو.
دا په داسې حال کې ده چې افغانستان کې پر کورونا د اخته کسانو شمېر ۹۴ ته رسېدلی دی چې له دې ډلې ۳ يې ښه شوي دي او ۴ يې مړه شوي دي.
