د افغانستان فوټسال ملي لوبډلې و نه کړی شو، چې د اسیا فوټسال ټاکنیز پړاو سیالیو لومړۍ بریا ترلاسه کړي چې د کوربه لوبډلې پر وړاندې یې ماته وخوړه.

د اسیا فوټسال جام ته د مرکزي اسیا فوټسال لوبډلو ترمنځ د غوراوي پړاو سیالۍ نن د تاجکستان په کوربتوب د افغانستان، تاجکستان، ترکمنستان او قرغزستان فوټسال ملي لوبډلو ترمنځ پېل شوې.

د سیالیو د رسمي ویبپانې د معلوماتو له مخې، چې په روانو لوبو کې افغانستان خپله لومړۍ لوبه د تاجکستان خلاف ترسره کړه چې ۶ د ۵ ګولونو پر وړاندې کوربه لوبدلې وګټله.

ټاکل شوې ده، چې د افغانستان فوټسال ملي لوبډله اسیایي فوټسال سیالیو ته د لارې موندنې په موخه دویمه لوبه ټاکنیزه پړاو لوبه سبا د ترکمنستان فوټسال ملي لوبډلې خلاف ترسره کړي.

د افغانستان فوټبال فدراسیون له خوا خپره شوې خبرپاڼه کې راغلي دي، چې د افغانستان فوټسال ملي لوبډله به سبا یک شنبه (نومبر ۱۵مه) غرمه ۱۰ نیمې بجې له ترکمنستان فوټسال ملي لوبډلې خلاف د لوبې ډګر ته ووځي.

ټاکل شوې ده، چې د روانو سیالیو وروستۍ لوبه به افغانستان له قرغزستان فوټسال ملي لوبډلې سره د روانې نومبر میاشتې په ۱۶ مه نیټه ترسره کړي.

د تاجکستان خلاف لوبه کې د افغانستان له پاره اکبرکاظمي دوه خو مهدي هاشمي ، حسین خادمي او مهدي نورزي ګولونه ترسره کړل خو افغان لوبډله یې بریا ته ونه رسوله.

دغه سیالۍ د اسیا وچې د ۲۶ هیوادونو ترمینځ په تاجکستان، مالیزیا، منګولیا او تایلینډ کې پیل شوي دي، چې ۱۶ لوبډلې به ترې د اسیا فوټسال جام سیالیو ته غوره شي.

په ترسره شویو سیالیو کې تراوسه ۱۲ لوبډلې له ټاکنیز پړاو څخه د اسیا فوټسال جام سیالیو ته رسیدلي دي او د پاتو ۴ لوبډلو برخلیک به د روانو سیالو په پایله کې معلوم شي.

د اسیا فوټسال فدراسیون زیاتوي، چې ټاکل شوې ده د ۲۰۱۶ م ز کال فوټسال سیالیو ۵ مخکښې لوبډلې به د کولمبیا په کوربتوب فوټسال نړیوال جام سیالیو ته لاره پیدا کړي.

د یادونې وړ ده، چې د تاجکستان په کوربتوب د فوټسال اسیایي ټاکنیز پړاو سیالیو ته د ښه تیاریو په موخه افغان فوټسال ملي لوبډلې روانه میاشت په ایران کې هم یوه اونۍ تمرینات ترسره کړل.