.jpg)
د افغانستان ۲۰ کلنې فوټسال ملي لوبډلې د اسیا په فوټسال سیالیو کې بحرین ۲۰ کلنې ملي لوبډلې ته ماتې ورکړه.
د تایلینډ په کوربتوب د ۲۰ کلنو اسیایي فوټسال سیالیو کې د افغانستان ۲۰ کلنې ساحلي فوټسال ملي لوبډلې د ۵ لوبو وروسته په ۳ بریاوو او ۲ ماتو ټولټال ۹ امتیازونو سره په خپل الف ګروپ کې له عراق او تایلینډ وروسته د خپل ګروپ دریم مقام ترلاسه کړ.
د دې سیالیو په وروستۍ لیګ لوبه کې افغان لوبډلې ۴ د ۱ ګول په وړاندې نن د بحرین لوبډلې ته ماتې ورکړه او درېیمه بریا یې خپله کړه.
له دې مخکې افغانستان پرون د کوربه تایلینډۍ ۲۰ کلنې فوټسال ملي لوبډلې په وړاندې د ماتې خوړلو وروسته په روانو سیالیو کې له مخکې تګ پاتې شوه.
افغانستان د تایلینډ په ۲۰ کلنو فوټسال سیالیو کې ۵ لوبې ترسره کړي، چې په ۳ کې یې بریاوې خپلې کړي او ۲ سیالۍ یې د عراق او تایلینډ په وړاندې وبایللې.
.jpg)
افغان ۲۰ کلنې ساحلي فوټسال ملي لوبډلې دغه سیالۍ برونایې فوټسال لوبډلې ته ۱۴ د ۱ ګول په وړاندې په سترې بریا سره پیل کړې، چې ورپسې لوبه کې یې مالیزیا ته هم ماته ورکړه.
د تایلینډ په کوربتوب د ۲۰ کلنو په اسیایي فوټسال سیالیو کې د افغانستان په ګډون د ۲۱ هېوادونو لوبډلو په ۴ بېلابېلو ګروپونو کې لوبې ترسره کړې.
د لومړي پړاو وروسته له دویم ګروپ څخه اندونیزیا او ویتنام، ، له دریم ګروپ څخه ازبکستان او لبنان او څلورم ګروپ څخه ایران او منګولیا لوبډلو کوارټرفاینل پړاو کې د لوبېدو چانس ترلاسه کړ.
په دې سیالیو کې تراوسه د افغانستان له خوا جواد حیدري په ۱۰ ګولونو د ګډون کوونکو لوبډلو او لوبغاړو په کتار کې مخکښ ګول وهوونکې دی.
د اسیا ۲۰ کلنو فوټسال جام سیالۍ د روانې مې میاشتې په ۱۶مه نېټه پیل او د ۱۱ ورځو لوبو وروسته به د مې په ۲۶مه نېټه د اتلې لوبډلې په اعلان پای ته ورسیږي.
