افغانستان ملی خوفسیزلیک کینگشی، مملکتدهگی جاری اوروشده قوشنی دولتلرنینگ قولی بارلیگینی اثباتلاوچی حجت بارلیگی حقیده خبر بیرگن. ملی امنیت کینگشینینگ مسووللری، بو توغریده کوپراق حجت و معلومات قولگه کیریتیش باشلنگن دیگنلر.
ملی خوفسیزلیک کینگشینینگ سوزلاووچیسی تواب غورزنگ، قولگه کیریتیلگن بعضی حجتلرده افغانستانده دوام ایتهدیگن اوروش و ترتیبسیز لیکلرگه قوشنی دولتلرنینگ ارهلهشووی بولگنلیگی اثبات لنگن.
جناب غورزنگ، بو حقدهگی حجتلر تکمیل بولگندن سونگ دستلب افغانستاننینگ دوستی بولمیش دولتلر بیلن شریک قیلینهدی و کیین بیرلشگن ملتلر تشکیلاتینینگ خوفسیزلیک کینگشیگه تاپشیریلهدی دیگن. او، بی می تی نینگ خوفسیزلیک کینگشی آرقهلی ترورچیلرنی حمایت قیله دیگن دولتلر باسیم آستیگه آلینیشی بیلن مملکتده جنگری گروهلرنینگ فعالیتی توخته تیلیشیگه سبب بولیشی اوچون امید بیلدیرگن.
ملی امنیت کینگشینینگ بو توغریدهگی موضعگرلیکلری اخیرگی وقتلرده مملکتده قوراللی طالبلر ایریم قوشنی دولتلر تامانیدن حمایت ایتیلیشی حقیده نشر بولگن میش – میشلردن کیین بیلدیریلماقده.
قوراللی طالبلرنینگ عملدهگی رهبری ملا هیبتالله بوندن نیچه کون آلدین روسیهگه سفر قیلگنی توغریسیده میش -میشلر ترقه تیلگن ایدی. شونینگدیک بو حرکت نینگ بعضی هیاتلری ایرانگه سفر قیلگنلیگی تیلگه آلینهدی. اما، بو حقیده گی میش – میشلر هنوزگچه طالبلر یا –ده باشقه بیر معین منبع تامانیدن تصدیق لنمهگن.