ایش، اجتماع و ناگرانلر وزیرلیگی‌نینگ اورین باسری واصل نورمهمند بوگون (سه‌شنبه) کابل‌ده اوتکزیلگن ییغین‌ده هنوز هم مملکت بویلب اوچ میلیون بلاغت‌گه ییتمه‌گن باله‌لر جدی زیان کوره یاتگن‌لیکلرینی معلوم قیلگن.
او، بوگون کابل‌ده افغانستانلیک بلاغت‌گه ییتمه‌گن باله‌لرنی حمایت قیله دیگن اداره‌لر تامانیدن اوتکزیلگن ییغین‌ده بو قبیل سوزلرنی تیل‌گه آلگن. افغانستانده بلاغت‌گه ییتمه‌گن گودک‌لر تورلی قیینچی‌لیکلر جمله‌دن توانلریدن آغیر ایش بجریش، جنسی سوءاستعمال ایتیلیش و ترورچیلیک هجوملرنی عمل‌گه آشیریش اوچون فایده لنه‌دیلر.
مملکت ایش قانون لایحه‌سی‌نینگ تورتینچی ماده‌سی‌گه موافق بلاغت‌گه ییتمه‌گن گودک‌لرنینگ ایش قیلیشی منع ایتیلگن. شونینگ‌د‌‌یک اوشبو قانون نینگ 13 ماده‌سی‌ده اون بیش یاش‌گه تولگن باله‌لر معین شرایط اساسی‌ده ایش قیلیش‌لریگه رخصت بیریلگن.
عین حالده، ایش، اجتماع و ناگرانلر وزیرلیگی‌نینگ اورین باسری، زیان کوره‌دیگن بلاغت‌گه ییتمه‌گن باله‌لر حق و حقوقی‌گه ایریشیش اوچون اولرگه اوقیش شرایطی یره‌تیب بیریش، اسلامی قدریت‌لرنی رعایه قیلیش، باله‌لر حقوق کنوانسیونی و بو قتلم اوچون مخصوص ملی بودجه اجره تیلیشی اوستیده تاکیدله‌گن.
باشقه تاماندن، افغانستانلیک بلاغت‌گه ییتمه‌گن گودک‌لرنی حمایت قیلووچی خلق ارا اداره‌لر، باله‌لر حمایت ایتیلیشی اوچون اوچ ییل‌لیک لایحه ترتیب بیریلیشی نظرده توتگن‌لیکلرینی معلوم قیلگن‌لر.
بو اداره‌نینگ باشلیغی وحید احمدزی، مذکور لایحه "سونگی باله‌گه قدر" نامی آستیده دنیا بویلب خبردار قیلیش اوچون یول‌گه قوییله‌دی دیگن. ایتیلیشیچه، بو برنامه 2018- ییل‌گه قدر دوام ایته‌دی.
افغانستانلیک باله‌لرنی حمایت ایتووچی خلق ارا اداره‌لر مسوول‌لری‌نینگ سوزلریگه کوره، مذکور اوچ ییل‌لیک لایحه‌ده باله‌لرنینگ تیریکچیلیگی، اوقیشی و خوفسیزلیک مساله‌لریگه مرکزلشتیریلگن.
بونگه قره‌می، مملکت‌نینگ تانیقلی آوازخوانی همده افغانستانده باله‌لرنی حمایت قیلووچی خلق ارا اداره‌لرنینگ ایلچی‌سی فرهاد دریا ییغین‌ده افغانستان حکومتی رهبرلرینی باله‌لر وضعیتی‌گه اعتبار بیرمه گن‌لیکلرینی تنقید قیلگن.
او، کوچه‌لرده‌گی همده باش پنه‌سیز قالگن باله‌لر معماسی بوتونلی بر طرف ایتیلمه‌گن حالده، زیان کوریب کیله دیگن بلاغت‌گه ییتمه‌گن گودک‌لرنینگ قیین‌چیلیگی حل بولیشی ممکن ایمس دیگن.
ییغین‌ده اشتراک قیلگن دولت و نا دولت اداره‌لری‌نینگ نماینده‌لری، باله‌لرنی حمایت ایتیش اوچون ایشلب چیقاریله دیگن اوچ ییل‌لیک برنامه‌نی خوش قرشیلیب، بو لایحه عمل‌ده تطبیق ایتیلیشی اوستیده تاکیدله گن‌لر.
