ساغلیق‌نی سقلش وزیرلیگی نینگ اعلان قیلیشیچه، اوتگن 24 ساعت جریانیده 1003 شبهه‌لی مورد سیناودن اوتکزیلگن و بو جمله‌دن 492 ته‌سی ایجابی تانیلگن.
اوشبو ینگی 492 ایجابی واقعه شامل مملکت بوییچه کرونا ویروسی‌گه چلینگن‌لرنینگ سانی 8145 کیشی‌گه کوپه‌یگن.
ساغلیق‌نی سقلش وزیرلیگی نینگ ساغلیک خذمت‌لر عرضه قیلیش اورین باسری وحیدالله مجروح نینگ ایتیشیچه، اوتگن بیر کیچه و کندوز ده 262 واقعه کابل، 59 واقعه هرات، 33 واقعه بلخ، 30 واقعه بغلان، 28 واقعه تخار، 14 واقعه جوزجان، 20 واقعه پکتیا، 20 واقعه ننگرهار، 19 واقعه پنجشیر، 19 واقعه پروان و باشقه 28 واقعه کنر، لوگر، کاپیسا، سرپل، فراه و غزنی ولایت‌لریده قید ایتیلگن.
جناب مجروح گه کوره، اوتگن 24 ساعت جریانیده کرونا ویروسی‌گه چلینگن‌لردن 4 ته‌سی ننگرهار، 3 ته‌سی بلخ و باشقه 3 ته‌سی هرات، جوزجان و پنجشیر ولایت‌لریده دنیا دن اوتگن و حاضرگه‌قدر دنیا دن اوتگن‌لرنینگ سانی 187 کیشی‌گه کوپه‌یگن.
ساغلیق‌نی سقلش وزیرلیگی مسووللری نینگ ایتیشیچه، اوتگن بیر کیچه و کندوز ده کرونا کسل‌لریدن 80 ته‌سی درمان‌لنگن و مملکت بوییچه درمان‌لنگن‌لرنینگ سانی 930 کیشی‌گه ییتیشگن.
ساغلیق‌نی سقلش وزیرلیگی نینگ آگاه‌لنتیریشیچه، هییت کونلریده بیره‌م آلیش‌لر دوام قیلگن صورتده، کرونا ویروسی‌گه چلینگن‌لرنینگ سانی کوپه‌یشی ممکن.
