طالب‌لرنینگ ملا رسول قناتی‌نینگ معاونی طالب‌لرنینگ تنیقلی سیمالریدن ملاعبدالمنان نیازی یقین‌ده طالبان رهبری ملا اختر منصورنی مملکت جنوبی‌ده اوزبیکستانلیک جنگریلرنی قتل ایته یاتگن لیککه عیبله‌گن ایدی. نیازی تیلی بیلن ایتگنده طالب‌لر رهبری مذکور حرکت‌نینگ سابق رهبری ملا عمرنینگ اوزبیکستانلیک مهمانلرنی شفقت‌سیزلرچه نابود ایته باشله‌گن.
عین حالده زابل ولایتیده اوزبیکستانلیک جنگریلرنینگ جندالله قناتی تامانیدن اجتماعی ترماق‌لرده یایینلنگن ینگی بیر ویدیوده اوزبیک تیلیده زارلنیب گپیرگن نصرت الله اسملی شخص، اوزبیک جنگریلرنی طالب‌لرنینگ ینگی رهبری ملا اختر منصوردن یوز اوگیریب "اسلامی دولت" باشلیغی ابوبکر البغدادی‌گه بیعت بیلدیرگن لیکلری اوچون طالب‌لر طرفیدن هلاک ایتیله یاتگن لیکلرینی ایته‌دی.
اونگه کوره طالب جنگریلر زابل‌ده اونلب اوزبیک‌لرنی جمله‌دن اولرنینگ باله‌لرینی اوی‌لریگه کیریب قتل ایتگن‌لر. مذکور شخص طالبان رهبری ملا اختر منصورنی اوزبیک جنگریلرنی البغدادی‌گه بیرگن بیعتی‌نی آلیب اوزی گه بیعت قیلیش‌لرینی سوره‌گن. اوشبو صحبت‌ده اوزینی نصرت الله دیگن اوبیکستانلیک جنگری اوز صفداش‌لرینی "خلیفه" لری‌گه بیرگن بیعت‌لرینی قه یتریب آلمس لیکلرینی تاکیدله‌گن.
معلوم که اوزبیک جنگریلر، اوزبیکستان اسلامی حرکتی طالب‌لرنینگ سابق رهبری ملا عمر وفات ایتگنی فاش ایتیلگنیدن سونگ ملا اختر منصورنی اوشبو خبرنی کمیده ایکی ییل سر سقله‌گن لیککه متهم قیلیب اوشبو حرکت‌نی "اسلامی دولت" نینگ اجره‌لمس بیر قسمی‌گه ایلنگنی‌نی اعلان ایتگن ایدیلر.
حاضرگی کونده اکثریتی افغانستانده فعالیت آلیب باره دیگن اوزبیکستانلیک جنگریلر قلتیس بیر وضعیت بیلن روپه ره بولگن‌لر. اولرنینگ طالب‌لردن یوز اوگیریب داعش‌دن حمایت ایتیش‌لری بونده‌ی بیر ناچار احوال‌گه مقابل قیلگن اساسی عامل حسابلنه‌دی. افغانستان ایچکریسی‌ده هم دولت هم طالبان همده امیریکه و ناتو کوچلری مذکور جنگریلرنی نشان‌گه آلماقده‌لر. کونی کیچه افغانستان‌نینگ شرقی ولایت‌لریدن خوست‌ده اقش حربی‌لری تامانیدن اوتکزیلگن مخصوص حربی عملیات نتیجه‌سیده کمیده آلتی اوزبیکستانلیک جنگری جمله‌دن ایکی عیال یوق قلینگنی باره‌سیده خبر بیریلگن ایدی.
اوزبیکستانلیک جنگریلرنی موجود وضعیت‌دن چیقیشلری اوچون اولر آلدیده طالبان‌نینگ ینگی رهبری ملا اختر منصوردن حمایت ایتیشدن بولک چاره قالمه گندیک کورینه‌دی. عکس حالده اولرنی طالب جنگریلر تامانیدن قیریلیب تشله نیشلری ممکن. افغانستان شمالیده وضعیت بیر آز فرق قیله دی. مملکت شمالیده فعالیت آلیب باره‌دیگن اوزبیکستانلیک جنگریلر محلی اوزبیک‌لر یشه یدگن منطقه‌لرده جان سقلشلری ممکن.
شونینگ‌دیک محلی اوزبیک طالب جنگریلرنی ملا اختر منصور بویروغی اساسیده اولر گه قرشی اوت آچمس لیکلری احتمالی کوچلی. هر حالده داعش چارچوبه‌سیده فعالیت آلیب باریش مذکور جنگریلر اوچون تهلکه میدانی‌نی تاباره تنگ قیلگن. افغانستانده دولت بیلن طالب‌لر ارا تینچلیک مذاکره‌لری قیته باشلنیب اوشبو مذاکره‌لر معین نتیجه‌لرگه ایریشگن تقدیرده هم اوزبیکستانلیک جنگریلر احوالی ینه‌ده یامانلشیشی طبیعی بیر حال. اولرنی یقین آره‌ده کیچیریم سوره‌ب اوزبیکستان دولتی‌گه یوزلنیش‌لری اوچون هم شرط شرایط‌لر موجود ایمسدیک کورینه‌دی.
اوزبیکستان دولتی هم مذکور جنگریلرنی عفو ایتیشی باره‌سیده اویلب هم کورمه‌گن. رسمی اسلام آباد بیلن تاشکینت مناسباتلری یخشی لنماقده. پاکستان باش وزیری نواز شریف اوزبیکستان دولتی بیلن اوز ارا همکارلیکلرنی عمل‌گه آشیریش اوچون مهم شرطنامه‌لرگه قول قویگن. بوندن نری اوزبیکستانلیک جنگریلرنی پاکستانده قالیب کون کوریش‌لری ینه ده قیینلشه‌دی.
اولر اوزلری قاله ویرسه عایله اعضالرینی هلاکتدن قوتقریش اوچون اوز قورال یراقلرینی ییرگه تشلب، بیرلشگن ملت‌لر تشکیلاتی همکارلیگیده بعضی بیر ممکت‌لردن باش پنه سوره‌شلری ممکن. اوزبیکستانلیک جنگریلر اوتمیشی‌گه بیر نظر اوزبیکستان 1991 ییلی اوز مستقل لیگی‌نی اعلان ایتیشیدن سونگ اسلامی کوزقره شده‌گی ایریم تیوره‌کلر اندیجان شهریده قوزغلان کوترگن ایدیلر. مذکور حرکت‌نینگ ییتکچی رهبرلریدن طاهر یولداش اندیجانده اوزبیکستان رهبری اسلام کریموف بیلن اوچره‌شگنیده اوندن مملکت‌ده شریعت قانون قاعده‌لری حاکم ایتیلیشی‌نی سوره‌گن گن ایدی.
کریموف اندیجاندن تاشکینت‌گه قه‌یتگچ قوزغلانچیلرنی اوشلب جزالنیش لری باره‌سیده بویروغ بیرگن. اولردن ایریملری قملدی. طاهر یولداش ایسه بیر قطار همکارلری بیلن قاچیب افغانستان گه اوتگن. طالب‌لر کابل‌نی تصرف ایتگنده اولر کابلده طالب‌لر حمایتی‌دن بهره من بوله دیلر. طالبان‌نینگ سابق رهبری ملا محمدعمر همده القاعده نینگ سابق باشلیغی اسامه بن لادن اوزبیکستان اسلامی حرکتی‌نی قتیق حمایت ایته‌دی.
طاهر یولداش رهبرلیگیده‌گی اکستریمستیک حرکت القاعده‌گه اعضا بوله‌دی. مذکور گروه‌نینگ تنیقلی قوماندانی جمعه بای نمنگانی اوز جنگریلری بیلن افغانستان شمالیده شمال اتفاقی‌گه قرشی جنگلرده فعال قتنشه‌دی. جمعه بای 2001 ییلی آخرلریده مزارشریف شهری اطرافیده امریکا هوا هجومیده قتل ایتیلگن ایدی. طالب‌لر حاکمیتی قوله تیلیشی بیلن اوزبیکستان اسلامی حرکتی جنگریلری پاکستان نینگ پشتون قبیله‌لری حدودلری اینیقسه شمالی وزیرستانده جایلشه دیلر.
طاهر یولداش 2009 ییلی وزیرستانده امریکانینگ اوچوچی‌سیز طیاره‌سی هجومیده نابود ایتیلگن ایدی. اوندن سونگ مذکور حرکت گه طاهر یولداش‌نینگ کیاوی عثمان غازی رهبر ایتیب تعیین‌لنگن ایدی. وزیرستانده پاکستانلیک محلی طالب‌لر بیلن اوزبیک جنگریلر اورته‌سیده قانلی اوروشلر یوز بیرگنده مذکور حرکت نینگ بیر قطار اعضالری افغانستان‌نینگ جنوبی ولایت‌لری جمله‌دن طالبان نینگ سابق قوماندانلریدن ملا دادالله حمایتی ده زابل ولایتیده جایلشه دیلر.
کیینگی آیلرده پاکستان‌نینگ قبیله‌لر منطقه‌لریده اوتکزیلگن حربی عملیات‌لر نتیجه‌سیده اوزبیکستان اسلامی حرکتی‌گه وفادار جنگریلرنینگ کته قسمی مذکور حدودلردن سیقیب چیقریلیب، افغانستان‌گه اوته دیلر. حاضرگی کونده اوزبیکستان اسلامی حرکتی و جندالله کبی اکستریمست گروه‌لر ترکیبی‌ده جنگ قیله دیگن اوزبیکستانلیک جنگریلرنینگ اونلب نفری افغانستان نینگ شمال ولایت‌لریده فعالیت آلیب بارماقده‌لر.
