د هېواد په بېلابېلو ولایتونو کې د پښتون ژغورنې غورځنګ د مشر منظور پښتون نیول کېدو په اړه لاریونونه او اعتراضونه شوي دي.
دا لاریونونه وروسته له هغې کېږي چې د پاکستان حکومت د روانې اوونۍ د دوشنبې پر شپه د پېښور په تاکال سيمه کې د پښتون ژغورنې غورځنګ مشر منظور پښتون د هغه هېواد پولیسو ونیو چې ورسره سم د ډیورنډ فرضي کرښې دواړو غاړو او د نړۍ بېلابېلو هېوادونو کې د پښتنو غبرګونونه هم راوپارېدل.
د سې شنبې په ورځ د ختیځو دوو ولایتونو ننګرهار او کونړ تر څنګ کابل، خوست، پکتیا، پکتیکا، غزني، کندهار او یو شمېر نورو ولایتونو کې د منظور پښتون د نیول کېدو په غبرګون د ولسي وګړیو پراخ لاریونونه او اعتراضیه ناستې وشوې.
د دغو ټولو ولایتونو لاریون والو د منظور پښتون مبارزه حقه وګڼله او د هغه نېول کېدل يې وغندل. لاريونوالو لیکل شوي شعارونه هم له ځانه سره لېږدول چې په کې د پښتين د ژر تر ژره خوشې کېدو غوښتنې شوې وې.
د کونړ یو لاریونوال او پخواني سناتور رفیع الله حیدري د لاريون په پای کې د يوه پرېکړه لیک د لوستلو پر مهال وویل، پاکستاني حکومت له کلونو راهیسې هغه هېواد کې د پښتون ولس پر وړاندې له زور، زیاتي کار اخيستی او نه پرېږدي چې هلته پښتانه ارام ژوند ولري.
نوموړي وویل، پښتانه د تاریخ په اوږدو کې د پردیو دسیسو او سیاستونو ښکار شوي؛ خو اوس یې وخت دی چې دغه لوی قوم د خپلو حقه حقونو د تر لاسه کولو لپاره غږ پورته کړي.
د ننګرهار او کونړ لاریونوالو پر پاکستاني حکومت، ای ایس ای او نورو هغو د مرګ شعارونه ورکول چې د پښتنو د غږ خپه کولو کوښښ کوي.
ننګرهار کې مدني فعال او د سلګونو لاریونوالو له ډلې یوه، ډاکټر اسدالله ښالېز وویل، پاکستان هغه څوک ځوروي چې نړۍ ته د پښتنو اصلي څېرې ښودلو تر څنګ هغوی ته حقوق غواړي.
په ورته وخت کې په کندهار کې هم راټولو شویو سلګونو لاریونوالو د منظور پښتون نیول کېدل وغندل او د بشري حقونو پر ادارو یې غږ وکړ چې پر پاکستان فشار راوړي، څو په هغه هېواد کې پر پښتنو روان زور، زیاتی پای ومومي.
د افغانستان اوسني ولسمشر محمد اشرف غني، مخکني ولسمشر حامد کرزي او یو شمېر سیاستوالو هم ژر تر ژره د پښتون د خوشې کېدو غوښتنې کړې دي.
ولسمشر محمد اشرف غني د منظور پښتین د نیونې په تړاو غبرګون کې ویلي چې د منظور پښتون او د هغه د ملګرو نیونې خواشینی کړی دی.
خو د پاکستان د بهرنیو چارو وزیر شاه محمود قریشي د ولسمشر غني ټوېټري پیغامونه د پاکستان په کورنیو چارو کې لاسوهنه بللې ده.
د پښتون ژغورنې غورځنګ د مشر منظور پښتون د نیول کېدو غبرګون کې نن د پاکستان بېلابېلو سیمو کې هم لاریونونه شوي او د پي ټي ام مشران وايي، دا لاریونونه به تر هغې دوام کوي چې څو منظور پښتون ازاد شوی نه وي.
په ورته مهال د منظور پښتون نيونې د انساني حقونو د فعالانو، نړیوالو ادارو او چارواکيو غبرگون هم را پارولی دي.
د بښنې نړیوال سازمان د اسیا څانګې د منظور پښتون د سملاسي خوشې کېدو غوښتنه کړې ده.
منظور پښتون داسې مهال نيول شوی چې همدا تېره اوونۍ يې د پښتونخوا په بنو کې د زرګونو راټولو خلکو غونډې ته په وينا کې د پاکستان په حکومت تنُدې نېوکې کړې وې.
په دې تړاو: