پزشکان شفاخانۀ ولایتی غور به علت نداشتن مصونیت کاری اعتصاب کرده‌اند. این پزشکان با متوقف‌کردن عرضۀ خدمات صحی در این شفاخانه می‌گویند که هیچ‌گونه مصونیت کاری ندارند و همواره از سوی نیروهای امنیتی و پایوازان بیماران لت‌وکوب و توهین‌وتحقیر می‌شوند.
محمدنذیر پارسا، رئیس شفاخانۀ ولایتی غور تأکید می‌کند و می‌گوید، تا زمانی‌که دولت امنیت پزشکان و مراکز درمانی را به گونۀ جدی تأمین نکند دست از اعتصاب کاری نمی‌کشند و بیماران را درمان نمی‌کنند.
ضیاالدین ضمیر، از پزشکان شفاخانه ولایتی غور که شب گذشته از سوی زورمندان و پایوازان یک بیمار لت‌وکوب شده می‌گوید، هر لحظه در هراس است که شاید باز هم کسی او را لت‌وکوب و توهین‌وتحقیر کند.
این پزشکان می‌گویند که بارها مشکل‌شان را با نهادهای مسئول در میان گذاشته‌اند، اما تاکنون هیچ توجهی در زمینۀ تأمین امنیت آن‌ها صورت نگرفته است.
آن‌ها هشدار می‌دهند تا زمانی‌که دولت امنیت پزشکان و مراکز درمانی را به گونۀ درست تأمین نکند، از تحصن دست نمی‌کشند.
مسئولان امنیتی غور در این باره حاضر به گفت‌وگو نشده‌اند.
اما حبیب‌الله رادمنش، معاون والی غور می‌گوید که ادارۀ محلی به خواسته‌های این پزشکان رسیده‌گی می‌کند.
رادمنش می‌گوید که این موضوع را با مسئولان امنیتی در میان گذاشته‌اند و با کسانی که پزشکان را لت‌وکوب کرده‌اند برخورد قانونی صورت می‌گیرد.
این در حالی‌ست که نه تنها در ولایت غور بلکه در کابل نیز بارها بسته‌گان بیماران در شفاخانه‌ها به ویژۀ شفاخانۀ کووید – 19 افغان-جاپان پزشکان را لت‌وکوب کرده‌اند که این کار انتقاد مسئولان وزارت صحت را برانگیخته است.
این وزارت گفته است که هرگاه لت‌وکوب پزشکان ادامه یابد، آن‌ها از کار دست خواهند کشید.
