اعتراض به پرداخت پول در شفاخانه‌های دولتی

تصمیم حکومت مرکزی مبنی بر گرفتن پول در بدل عرضۀ خدمات صحی از سوی شفاخانه‌های دولتی، با اعتراض باشندگان غور مواجه شده است.

شماری از باشندگان و بیمارداران غور با انتقاد از مسئولان شفاخانۀ مرکزی این ولایت می‌گویند، با آن که آنان برای درمان بیماران خود پول می‌پردازند، اما خدمات صحی به گونۀ درست برای بیماران عرضه نمی‌شود. آنان می‌‌گویند که هنوز هم تمام داروهای مورد نیازشان را از داروخانه‌های شخصی خریداری می‌کنند.

اما میراجان احمدی، آمر شفاخانۀ ولایتی غور این ادعای باشندگان شهر فیروزکوه را رد می‌کند و می‌گوید که آنان در بدل پولی که می‌گیرند، خدمات ارایه می‌کنند.

جمعه‌گل یعقوبی، رئیس صحت غور با آن که فقروتنگدستی باشندگان این ولایت را می‌پذیرد، اما می‌گوید که پرداخت پول بر اساس فیصلۀ کابینه صورت می‌گیرد و این می‌تواند در بهبود کیفیت خدمات درمانی کمک کند.

به گفته رئیس صحت غور، شفاخانه‌های دولتی تنها ده درصد خدمات درمانی را برای افراد فقیر، شماری از مجروحان، خانم‌های باردار و مهاجران به گونۀ رایگان عرضه می‌کند.

باشند‌گان غور از مسئولان محلی و مرکزی می‌خواهند که خدمات شفاخانه‌های دولتی را رایگان بسازند و یا هم در بدل پولی که از آنان گرفته می‌شود، خدمات بهتری ارایه کنند.