مملکت یشاووچی‌لری، یاش‌لر و اونلب مدنی جماعه‌چیلیک فعال‌لری بوگون (شنبه) کابل‌ده ییریک اعتراض بیلدیریب مملکت نماینده‌لر مجلسی بناسی قرشی‌سیده توپلگن‌لر. ملی بیرلیک حکومتی رسمیلرینی تنقید قیلگن اوشبو اعتراضچی‌لر مملکت‌ده‌گی معمانینگ اصلی عاملی ایش‌سیز لیک بولگن لیگینی ایتگنلر.
مدنی جماعه‌چیلیک فعال‌لریدن بیری باقی سمندرنینگ سلام‌وطندارگه ایتیشیچه، حکومت‌نینگ اعتبار بیرمه‌گن‌لیگی سبب اونلب یاش ایش ایزلش اوچون قوشنی مملکت‌لرگه سفر قیلیب مملکت‌نی ترک قیله دیلر. اونگه کوره، افغانستان خلقی‌نی ایش جایلری بیلن تامینلش‌گه مجبور دیر.
شونینگ‌دیک اعتراض بیلدیرگن‌لرنینگ سوزلریگه قره‌گنده، حکومت یاش‌لر اوچون ایش زمینه‌لرینی یره‌تمه‌گنلیکدن تشقری ایریم وقت‌ده اهالی ایشی‌گه توسقین‌لیک یره‌تیش گه حرکت قیله‌دی.
اعتراضچی‌لرنینگ آگاهلنتیریشیچه، حکومت اهالی اوچون ایش جایلرینی یرتمه‌گن حالده، کوپچیلیک یاش‌لر مملکت‌نی ترک قیلیشچه مجبور بوله‌دی. ایریم پیتلرده یاشلرنی بعضی ترورچی گروه‌لرگه قوشیلیشی تاکیدلنه‌دی.
عین حالده، یخشی حکومتچی‌لیک اوچون جمهور رییس‌نینگ مخصوص نماینده‌سی احمد ضیاء مسعود بوگون عالی تحصیلات وزیرلیگی نینگ بلند مرتبه‌لی رسمیلری بیلن بولگن اولتیریش‌ده ایتیشیچه، دولت اداره‌لری اورته‌سیده هماهنگ‌لیک بولمه‌گن لیگی مملکت‌ده ایش‌سیزلیک میزانی آشیشی‌گه سبب بولگن.
جناب مسعود عالی تحصیلات، معارف، ایش و اجتماعی وزیرلیک‌لری قوشیمچه جمهور رییس‌لیک سرایی ایش‌لری بوییچه اداره‌دن افغانستان‌ده ایش‌سیزلیک معماسی حل ایتیلیشی همده ییل‌ده مملکت بویلب بیلیم یورت‌لر و مکتب‌لرنی بیتیره دیگن‌لرگه حکومت ایش تاپیب بیریش اوچون قوشمه بیر لایحه ایشلب چیقیش‌لرینی سوره‌گن.
اون ایکی ماده‌لیک قطعنامه صادر قیلگن اعتراضچی‌لر افغانستان ملی بیرلیک حکومتی‌دن یاشلرنی ایش جایلری بیلن تامین ایتیش حکومت‌نینگ بیرینچی برنامه‌سی بولیشی اوستیده تاکیدله‌گنلر. شونینگ‌دیک اعتراضچی‌لر حکومت بو قیین‌چلیکنی حل قیلمه‌گن حالده، مملکت‌ده امنیت تامین ایتیلیشی ناممکن دیگن‌لر.
