کابل شهرینینگ ایریم یشاووچیلری قندوز حادثهسیگه عکسالعمل بیلدیریب، قندوز ولایت محلی رسمیلری ایشدن آلینیب محاکمه ایتیلیشی بارهسیده تاکیدلهگنلر.
اعتراضچیلرنینگ قطعنامهسیده ملی بیرلیک حکومتدن جمهور رییسنینگ خوفسیزلیک مصلحتچیسی حنیف اتمر، ایچکی ایشلر وزیری نورالق علومی و ملی امنیت عمومی ادارهسی باشلیغی رحمتالله نبیللر ایشدن آلینیشی یازیلگن.
شونینگدیک قطنامهسیده یازیلیشیچه، ملی مدافعه وزیرلیگی سرپرستی معصوم استانکزی و قندوز سابق والیسی عمر صافی محاکمه ایتیلیشی کیرهک. قندوز والیسی اوتگن کون ایشدن چیتلهتیلدی.
اعتراضچیلرگه کوره، قندوز ولایتینی سقوط قیلیب طالبلر اشغالیگه اوتگنی حکومت ایچیده بیشینچی ستون فعاللیگینی انگلتهدی و حکومت ایسه بولرنی تانیشی لازم.
اونلب کیشیدن عبارت مذکور اعتراضچیلر بوگون (پنج شنبه) کابل ده مسعود چهاراههسیدن زنبق چهاراههسیگچه یول یوریگنلر.
حکومتنی قوراللی طالبلردن حمایت قیلگنلیکده عیبلهگن اعتراچیلر، حکومت بلند مرتبهلی رسمیلری اوشبو ایشلریگه دوام بیرگن حالده اهالینینگ جدی عکساالعملیگه روپه ره بوله دیلر دیگنلر.
اولرگه کوره، اوروش جریانینی شمالگه تارتیش قومی اوروشنی وجودگه کیلتیرهدی و اوشبو ایش آلدی آلینمسه کیلهجهگی خطرلی دیر.
عین حالده قطع نامهده سپیدار قصری رهبری هم مملکت اهالیسی امنیتینی تامینلشده عاجز.
مذکور یول یوریگنلرگه کوره، ملی کوچلر بیلن مخالفلر اورتهسیدهگی اوروشده قندوز خلقی قربان بولهدی و حکومت بو اهالی امنیتی نی تامینلشگه قادر بولمسه اولرنی اوروش قربانی قیلمسلیگی هم کیرهک.
اصلی قندوز ولایتینینگ یشاووچیسی بولگن خانمحمد حکومت قندوز خلقی خوفسیزلیگینی تامینلشنی سورهگن.
اوشبو یول یورگنلردن باشقه بیریسی کریمه نینگ سوزلریگه کوره، مملکت اهالیسی قندوز و باشقه ولایتلرده اولدیریلهدیلر و اهالی دن هم طالبلر برابریده بیر بولیشلرینی سورهگن.
بغلان ده اهالی عصیان کوتارگن
باشقه بیر خبرگه قرهگنده بغلان ولایتینینگ یوزلب اهالیسی ملی کوچلردن حمایت بیلدیریب عصیان کوتارگنلر.
بغلان ولایتیده اهالی عصیان کوتارگنلیگی مسوولیتینی اوز ذمهسیگه آلگن سابق جهاد قوماندانلریدن بیری حاجی عالم نینگ سلام وطندارگه ایتیشیچه، ولایتنینگ اوچ مینگ اهالیسی قورالهنیب جنگری طالبلرگه قرشی اوروش قیلیش اوچون ملی کوچلر یانیده تورگنلر. حاجی عالم هیچ بیر زمان طالبلرگه بغلانگه کیریش اوچون رخصت بیرمسلیگی بارهسیده تایکدلهگن.
عین حالده، ولایت کینگشی نمایندهلری و بغلان یشاووچیلری ولایت امنیتی بوزیلیشی اوچون حکومتنی بی فرقلیککه عیبدار بیلگنلر.
بغلان ولایت کینگشی نینگ کاتبی بسمالله عطا نینگ سلاموطندارگه ایتیشیچه، دهنه ولسواللیگی قوراللی طالبلر قورشاوویده قالگن، اما حکومت موضوع اوچون هیچ قندهی اعتبار بیرمهگن.
باشقه تاماندن بغلان پولیس قوماندانلیگی نینگ سوزلاووچیسی ذبیحالله شجاع، تاله و برفک ولسواللیگی هم جنگریلر تصرفیگه اوتگن دیگن.
