افغانستان جمهور رییسلیک سرایی نینگ خبرنامه سیده یازیلیشیچه، افغانستان، پاکستان و دنیانینگ ترورچیلیککه قرشی کورهشه دیگن اتفاقداش مملکتلری تینچلیک و برقرارلیک تامینله نیشده صادقانه همکارلیک قیلیشده وعده بیرگنلر. شونینگ دیک خبرنامهده، افغانستان جمهور رییسی داکتر محمد اشرف غنی سونگی کونلرده پاکستان حکومتی آرقهلی ترورچیلیککه قرشی کوره شیش اوچون آلیب بارگن سعی حرکتلری اوچون منتدارلیک قیلگن دیب یازیلگن. عین حالده، جناب غنی پاکستان دولتی افغانستان دشمنلری- پاکستان نینگ یاولری ایکنی توغریسیدهگی اظهاراتینی خوش قرشیله گن. جمهور رییسلیک سرایی نینگ خبرنامه سیده، افغانستان و پاکستان ترورچیلرنینگ قوشمه تهدیدی بیلن روپه رهلیگی قید ایتیلگن. پکتیکا ولایتی نینگ یحیی خیل ولسوالیگیده صادر ایتیلگن هجوم و پاکستان نینگ پشاور شهریده حربیلر تصریفیده بولگن مکتب گه قیلینگن حمله ایکّیسی هم بیر ییریدن پلان لشتیریلگنلیگی ایتیلهدی. بوندن نیچه کون آلدین پاکستان ملی کوچلری حربی مرکزی نینگ باش قوماندانی راحل شریف نینگ « افغانستان یاولری پاکستان خلقی نینگ هم دشمنی» دییه آلگن سوز افغان ملازملر طرفیدن خوش قرشی لندی. راحل شریف افغانستانگه قیلگن سفری جریانیدهگی صحبتلریده ترورچیلر تینچلیک لایحه سیگه بویین یینگسین، یا- ده اصلی مرکزلری نابود ایتیلیشی توغریسیده آگاهلنتیرگن ایدی. اوتگن هفته پنجشنبه کونی پاکستان ایچکی ایشلر وزیری نثار احمد خان چودری، امریکاده قیلگن سفریده افغانستان و پاکستان حکومتلری ترورچیلیککه قرشی کورهشده کیلیشگن لیکلرینی ایتگن ایدی. عین حالده، افغانستان جمهور رییسی داکتر محمد اشرف غنی مدنی جماعهچیلیک ادارهلری مسووللری بیلن بولگن ملاقاتده، تینچلیک و برقرارلیک اورنه تیلیشی اوچون پاکستان دولتی بیلن هیچ قندهی یاشیرون معامله قیلمس لیگینی تیلگه آلگن ایدی. مذکور ییغینده اشتراک قیلگن مدنی جماعه چیلیک ادارهلر فعاللری نینگ سلام وطندارگه بیلدیریشلریچه، جمهور رییس غنی افراطیتگه ضد کوره شیش اوچون پاکستان و افغانستان اورته سیدهگی مذاکره لر ایجابی نتیجه بیریشیگه امین دیر.
