افغانستان نمایندهسی اسپینغربازان فوتبال تیمی بوگون (سهشنبه) دوستلیک اویینده بنگلهدیشنینگ پیتاگون تیمی بیلن مسابقه قیلیشی کوتیلهدی.
آسیا جنوب باشگاهلری مسابقهسیده افغانستان فوتبال تیم نمایندهسی بوندن آلدین اوچ گل اوریش بیلن سریلانکا سولید تیمینی یوتگن ایدی.
افغانستان لیگ برتر مسابقهلرینینگ تورتینچی دور قهرمانی اسپین غربازان بیرینچی مرته جنوبی آسیا مملکتلریده اوتکزیلهدیگن باشگاهی اویینلرده افغانستان نمایندهسی اولراق اشتراک قیلماقده.
«شیخ کامل» نامی آستیده جنوبی آسیا باشگاهلر مسابقهسی اکتوبرآیی نینگ 20 سیده بنگلهدیش پایتختی داکاده باشلنگن. ایتلیشیچه مذکور فوتبال بیلشو اون کون دوام ایتهدی.
افغانستان لیگ برتر فوتبال مسابقهسی هر ییل سکیز تیم اشتراکی بیلن پایتخت کابلده اوتکزیلهدی. مذکور اوینلرده مملکتنینگ سکیز زون فوتبال تیمی قتنشهدی. افغانستان فوتبال فدراسیون مسووللری، افغانستان کیلگوسی ییللرده فوتبال ساحهسیده دنیا معیارلریگه ماس تیم لرگه صاحب بولیشی توغریسیده امید بیلدیرگنلر.
افغانستان فوتبال فدراسیون مسووللریگه کوره، بنگلهدیش پیتاگون تیمی بیلن اسپین غربازان فوتبال اویینی بوگون افغانستان وقتی بیلن ساعت آلتیده باشلنهدی.
