د نوې ملي جبهې مشر انوارالحق احدي وایي، چې د حکومت مشرانو ترمنځ اختلافات شخصي بڼه لري او د اجرایوي ریاست جوړول د لومړي مرستیال رول په حکومت کې کمزوری کوي.
دی زیاتوي د نظام مشروعیت او اوسني حکومت مشرانو تر منځ اختلاف له منځه وړلو له پاره د حل دوه لارې شته، لنډ مهاله د سیاسي کمیسون جوړول او اوږد مهاله لاره یې ټاکنې دي.
احدي د ۵ شنبې په ورځ (نوامبر۳مه) کابل کې خبري غونډې ته وویل، د حکومت مشرانو ترمنځ اختلاف شخصي بڼه لري، چې لامل یې په خپله ګډ حکومت دی.
احدي زیاته کړه، چې د اجرایوي ریاست پوست په جوړولو سره په حکومت کې د ولسمشر لومړي مرستیال رول پیکه شوی.
د احدي پروینا، که د حکومت مشرانو ترمنځ اوسنی اختلاف حل هم شي، خو د نظام نه مشروعیت له امله په راتلونکې کې شونې ده، دغه اختلاف بیا هم سر راپورته کړي.
خو د ولسمشر مرستیال ویاند شاه حسین مرتضوي د احدي دې څرګندونو په غبرګون کې سلام وطندار ته وویل، چې د حکومت مشرانو ترمنځ اختلاف حل شوی او له وخت مخکې ټاکنو ته قانوني ځای نه شته.
نوموړي زیاته کړه: " زه ټینګار کوم چې د حکومت مشرانو ترمنځ هیڅ ستونزې نه شته حکومت هره ورځ خپل کار پر مخ وړي او هغه کسان چې د نویو ټاکنو ترسره کولو غوښتنه کوي اساسي قانون دې په غور سره ولولي."
مرتضوي زیاتوي، چې حکومت د خلکو پر ځای غوښتنو هرکلی کوي خو څه چې په اساسي قانون کې راغلي وي، هماغه پلي کوي.
د ویلو ده، چې په دې وروستیو کې د ولسمشر محمد اشرف غني او لومړي مرستیال عبدالرشید دوستم ترمنځ اختلافاتو زور اخیستی.
څو اوونۍ وړاندې دوستم په جوزجان کې د یوې خبري ناستې په ترڅ کې پر ولسمشر غني او د حکومت پر اجرایوي مشر عبدالله توندې نيوکې وکړې.
هغه وویل، چې اوسمهال دوی په خپلو کې مصروف دي او نورو مهمو مسایلو ته يې جدي پام نشته.
