د ولسمشر امنيتي سلاکار وايي، چې اوسمهال افغان دولت له القاعده، داعش، تحریک طالبان پاکستان، لشکرطیبه، د ازبکستان اسلامي خوځښت او شرقي ترکستاني خوځښت سره په جګړه کې بوخت دی.
د مشرانو جرګې د غړو ډیری پوښتنې په افغانستان کې د داعش ډلې پر فعالیتونو او شمالي ولايتونو کې د ناامنيو پر سر را څرخېدې.
حنیف اتمر په خپلو خبرو کې وویل، هغسې چې لازمه وه په سيمه کې د ترهګریزو ډلو د ځپلو له پاره لازم ګامونه نه دي پورته شوي.
اتمر وویل، په شمالي وزیرستان کې د پوځي عملياتو په ترڅ کې يواځې ځينې ترهګر یا د هغوی کورنۍ بې ځایه شوې.
د ده په وينا په نورو سيمو کې د وسله والو ډلو د ځپلو له پاره کوم اقدام ونه شو.
د ملي امنيت سلاکار وویل، وسله والې ډلې له زابله تر بدخشانه د پټنځايونو د جوړولو په هڅه کې دي او غواړي نه يواځې افغانستان بلکې د سيمې او نړۍ هېوادونو پر خلاف خپله جګړه جاري وساتي.
نوموړي زياته کړه، چې وسله وال مخالفين د پاکستاني پوځيانو عملياتو څخه وروسته د ډيورن کرښې دې غاړې ته اوښتي او په بدخشان او زابل ولايتونو کې يې پټنځايونه جوړ کړي.
د افغانستان د ملي امنيت سلاکار وویل، چې په بدخشان ولایت کې د پوځي عملياتو څخه وروسته د دغو ترهګرو ډلو څخه شاوخوا ۲۰ کسه نيول شوي او اوسمهال په کابل کې زنداني دي.
د ملي امنيت د شورا سلاکار محمد حنیف اتمر مشرانو جرګې ته د معلوماتو ورکولو پرمهال وویل، افغانستان د ترهګرو د فعاليتونو په اړه لاس تر زنی ناست نه دی.
د ملي امنيت د شورا سلاکار محمدحنیف اتمر د کابل او واشنګټن ترمنځ امنيتي تړون عملي کولو او د هېواد په شمالي ولايتونو کې د ناامنيو په باب د وضاحت ورکولو له پاره نن سه شنبه (۲۰۱۵ زېږدیز/ مې ۵) د مشرانو جرګې له لوري راغوښتل شوی و.
اتمر خبر داری ورکړ، چې اوس هم د افغانستان څخه د باندې د ترهګرو ځالې له منځه نه دي تللي او دغه موضوع کولای شي افغانستان ناامنه کړي او همدارنګه د افغان ځواکونو له پاره د ترهګرو پر وړاندې مبارزه هم ستونزمنه کړې.
نوموړي دا هم وویل، چې د ترهګرو د له منځه وړلو له پاره افغان حکومت سياسي او پوځي حرکتونه پېل کړي.
د مشرانو جرګې غړی رحمت الله اچکزي او نادر بلوچ اندېښنه وښوده، چې د امريکا سره د امنيتي تړون څخه وروسته د داعش ډله په افغانستان کې رېښې ځغلولي دي.
د ملي امنيت سلاکار د مشرانو جرګې غړو ته وویل، چې د کابل او واشنګټن امنيتي تړون د څلورو میاشتو راهیسې د عملي کېدو په حال کې دی او په دغه موده کې ښه پرمختګ شوی.
محمدحنيف اتمر زياته کړه، چې د تړون څخه وروسته افغان امنيتي ځواکونه د ناټو ځواکونو په شان مجهز شوي او د یو ميلیارډ او ۵۰۰ مېليونه ډالرو په ارزښت د پوځي الوتکو په برخه کې پانګونه شوې.
خو نوموړي زياته کړه، چې د هوايي ځواکونو په برخه کې اوس هم ستونزې شته او دغه ستونزې دوی اندېښمن کړي.
د افغانستان په هوايي قواوو باندې د ميليونونو ډالرو د لګښت سره سره اوس هم د دغه هېواد هوايي ځواکونه د جنګي بېلابېلو الوتکو له کمښت سره مخ دی.
