آمریکا تشقی ایشلر وزیرلیگینینگ اعلان قیلیشیچه، افغانستان تینچلیک لایحهسی بوییچه آمریکا خاص نمایندهسی زلمی خلیلزاد، افغانستان سیاسی رهبرلری بیلن اوچرهشگنیدن سونگ، دوحهگه سفر قیلیب طالبان گروهی بیلن تینچلیک سوزلشوولرنی قیته باشلهیدی.
اوتگن کونی آمریکا تشقی ایشلر وزیرلیگی تامانیدن ترقهتیلگن خبرنامهده ایتیلیشیچه، «خلیلزاد، طالبان گروهی بیلن صحبت قیلیش، افغانستانلیکلرارا سوزلشوولر باشلهنیشی و آتیشکسین آرقهلی زورهوانلیکلرنی کمهیتیریلیشی اوچون قیتهدن تینچلیک سوزلشوولرده قوشیلهدی.»
مملکت جمهور رئیسی محمداشرف غنی اوتگن کونی شام چاغیده، جناب خلیلزاد بیلن آق سراییده اوچرهشگن.
جمهورلیک ریاستی تامانیدن ترقهتیلگن خبرنامهده ایتیلیشیچه، ایکی تامان «آتیشکسین و دایمی تینچلیککه قول تاپیش اوچون طالبان گروهی نینگ چیتایللیک مملکتلرده بولگن قرارگاهلری خصوصیده صحبت قیلگنلر.»
اوشبو اوچرهشووده جمهور رئیسی غنی نینگ ایتیشیچه، تینچلیک لایحهسینی ایلگری آلیب باریش اوچون اوشبو ایکی موضوعنی جدی شکلده نظرگه توتیش کیرهک.
اجرایی باشلیغی هم عبدالله عبدالله نینگ زلمی خلیلزاد بیلن اوچرهشگنیدن خبر بیریب و جناب عبدالله تینچلیک خصوصیده آمریکا خاص نمایندهسی نینگ سعی و حرکتیدن حمایت قیلهدی دیگن.
افغانستان تینچلیک لایحهسی بوییچه آمریکا خاص نمایندهسی زلمی خلیلزاد و طالبان نمایندهلری آرهسیده بولگن تینچلیک سوزلشوولر 3 آی آلدین آمریکالیک بیر عسکرنینگ طالبان تامانیدن اولدیریلگنی باعث، دونالد ترامپ تامانیدن توختهتیلگن ایدی.
