افغانستان سیلاو ایرکین کمیسیونی نینگ سابق باشلیغی و مملکت سنامجلسی نینگ حاضرگی اعضاسی احمدیوسف نورستانی، آمریکاده فدرالی بیر محکمه تامانیدن «عمومی بودجه‌نی اوغیرلش» جنایتی گه محکوم بولگن.
آمریکا بوییچه عدلیه وزیرلیگی نینگ خبرنامه‌سی اساسیده، جناب نورستانی جنوبی کالیفرنیا منطقه‌سی نینگ محکمه‌سیده قیلگن اعترافیده میلادی 2015- ییل جولای آیی و میلادی 2018- ییل دسمبر آیی آره‌سیده سفرلری و یشش محلی توغریسیده یالغان ایتگن و ناقانونی شکلده آمریکا دولتی نینگ اجتماعی فراوانلیک بودجه‌سیدن یوز مینگ دالردن کوپراق پول قولگه کیریتگن.
اوشبو خبرنامه ده کیلیشیچه، نورستانی محکمه‌ده قیلگن اعترافیده، میلادی 2015- ییل نینگ جولای آیی‌ده دولتی مالی یاردم قولگه کیریتیش اوچون اجتماعی فراوانلیک اداره‌سی گه درخواست بیرگن.
اوشبو دولتی یاردملرگه حقلی تانیلگن آدم‌لر آمریکاده یشب و 30 کوندن آرتیق چیت‌ایللیک سفرلری توغریسیده دولت گه گزارش بیریشی کیره‌ک.
یوسف نورستانی نینگ اعتراف قیلیشیچه، اجتماعی فراوانلیک اداره‌سی گه سفرلری و یشش محلی توغریسیده نیچه مرته یالغان ایتگن.
او، ناقانونی شکلده مذکور اداره‌دن 27 مینگ دالردن آرتیق پول قولگه کیریتگن و 73 مینگ دالردن آرتیق پول هم اونینگ دارو و درمانی گه صرفلنگن.
جناب نورستانی، کیلیشوو بیتیمی دایره‌سیده، دولت پولی‌نی بوتونله‌ی قیتیریش گه کیلیشگن.
آمریکاده فدرال محکمه نینگ معلوماتی ده کیلیشیچه، دولت پولی‌نی اوغیرلش جزاسی 10 ییل قماق و 250 مینگ دالر جریمه بوله‌دی.
جناب نورستانی، میلادی 2020- ییل، 9- مارچ ده قیته‌دن محکمه گه حاضر بولیشی کیره‌ک.
کابل بوییچه آمریکا ایلچی‌خانه‌سی تامانیدن قیلینگن توییتده یازیلیشیچه، احمدیوسف نورستانی آمریکاده اوغیرچیلیک جنایتی گه محکوم بولگن.
احمدیوسف نورستانی، جاری قویاش ییل نینگ ثور آیی‌ده افغانستان بوییچه آغیر جنایت‌لرگه قرشی کوره‌ش محکمه تامانیدن 13 آی قماق و بیر میلیون افغانی جریمه توللش گه محکوم بولدی، لیکن حبس گه آلینمه‌دی.
قاره‌لاوچیلیک نینگ ادعا قیلیشیچه، احمدیوسف نورستانی، میلادی 2009- ییل‌ده هرات والیسی بولگن چاغیده، «ملی بس کارخانه‌سی» نینگ پولی‌دن بیر میلیون افغانی کوترگن و بو پولنی دولت گه قیترمه‌گن.
