قندوز گمرکی رسمی‌لری‌نینگ ایتیشیچه، قندوز- شیرخان بندری‌نینگ قتناو یولی‌ده‌گی آلچین کوپریکی پارتله‌تیلگنی‌دن بویان، مذکور ولایت گمرکی کونده اورته روش‌ده 2.5 میلیون افغانی زیان کوره‌دی.
آلچین کوپریکی شیرخان بندر بیلن باشقه تورت تومن‌نی قندوز مرکزی‌گه باغله‌یدی، ایکی کون آلدین، طالب‌لر تامانیدن پارتله‌تیلدی.
قندوز گمرکی باشلیغی عبدالله حارث‌نینگ ایتیشیچه، اوشبو اداره هر آی کمیده 35 میلیون افغانی عاید قیلردی و قندوز- شیرخان بندری‌نینگ قتناو یولی آچیلیب و آلچین کوپریکی قیته قوریلمه‌گن صورتده، نه فقط گمرک عایدی صفر بوله‌دی، بلکیم قندوز سوداگرلری کوپلب زیان کوره‌دی.
مذکور ولایت گمرک باشلیغی‌نینگ ایتیشیچه، شو کیچه کونده اوشبو بندرده چمه‌سی 25 موتر میوه و 100 دن آرتیق موترگه باشقه سوداگرلیک تَورلر آرتیلیب توخته‌تیب قوییلگن.
جناب حارث‌نینگ آگاه‌لنتیریشیچه، اوچ کون‌گچه بو قیینچیلیک حل ایتیلمه‌گن صورتده، موترلرگه آرتیلگن میوه‌لر اورته‌دن کیته‌دی.
قندوز گمرکی باشلیغی‌نینگ ایتیشیچه، آلچین کوپریکی بوزیلگنی‌دن کیلیب چیققن قیین‌چیلیک‌لرنی، رسمی‌لر بیلن شریک قیلگن و بو رسمی‌لر، کوپریک تیزلیک‌ده قیته قوریلیشی خصوصیده سوزبیرگن.
شونینگ‌دیک، آلچین کوپریکی قلعه‌زال، امام‌صاحب، دشت‌ارچی و کلبات تومن‌لری‌نینگ اهالیسی‌نی اصلی باردی و کیلدی یولی حسابلنه‌دی و بو کوپریک بوزیلگنی‌دن بویان، مذکور منطقه‌لرنینگ اهالیسی کوپینچه قیین‌چیلیک‌لرگه روپه‌ره بولگن‌لر.
