آلمان باش وزیری انگلا مرکل میلادی ینگی ییل باشلهنیشی بیلن یوللّگن نامهسیده، آلمان خلقیدن بو مملکتدهگی1.1 میلون مهاجر بیلن یخشی معالمه قیلیشلرینی سورهب، مهماننوازلیک قلیشلری اوچون تاکیدلهگن.
دستلب مهاجرلر آلمانگه باریشی بیلن، خانم مرکل اوروشدن جبر کورگنلرگه بو مملکتگه باش پنه بیریشی اوچون آلقیشلرگه سزاوار بولدی، اما، میلیونلب قاچقین او مملکتگه باریشگه یوز کیلتیریشی همده اولرنی اداره قیلیش خانم مرکلنینگ تشویشلریگه هم سبب بولدی.
بونگه قرهمی، انگلا مرکل ینگی ییل مناسبتی بیلن یازگن اوز پیامیده جدی قرار بیلن مهاجرلر اوچون بولگن سیاستینی حمایت قیلیب، بوگونکه معمانی کیله اوچون فرصت دیگن.
مهاجرلرنی درست شکلده سازماندهلیک قیلیش تاریخده میزبان مملکت اوچون ییریک اقتصادی و اجتماعی موفقیتلرگه سبب بولگن دیگن خانم مرکل. خانم مرکل، آلماننینگ بوگون وظیفهسی قاچقینلرنی حمایت قیلیب، اولرنی انسانی کرامتلریگه حرمت قیلیش دیگن. اما، اوروش جریانیده آواره بولگن میلیونلب انسانگه باش پنه بیریش هم شبههسیز آسان ایش ایمس دیگن آلمان باش وزیری.
سوریه، عراق و افغانستانلیک مهاجرلر آلمانگه باش پنه ایزلهگن قاچقینلردن. ایتیلیشیچه، میلادی جاری ییل جریانیده چمهسی 3800 کیشی اروپا باریش امیدیده دینگیزلرده سووگه غرق بولگن.
