مملکت نینگ قطار ولایت‌لریده یوز بیرگن کوچلی سوو تاشقین‌لری مالی و جانی زیان گه سبب بولگن. حکومت رسمی‌لری نینگ ایتیشیچه، اوتگن بیر کیچه-کوندوز ده مملکت ولایت‌لریدن کوپینچه‌سی کوچلی سوو تاشقین‌لریگه گواه بولگن و کابل بیلن هرات کوپلب زیان کورگن.

اوتگن بیر کیچه-کوندوز ده کابل، هرات، پروان، فراه، بادغیس، کنر، نورستان، کاپیسا، پنجشیر، لوگر، میدان وردک، دایکندی، بدخشان، جوزجان، فاریاب، سرپُل و غزنی ولایت‌لری کوچلی یامغیر و سوو تاشقین‌لریگه گواه بولگن.

بو آره‌دن کابل و هرات ولایت‌لریده یوز بیرگن سوو تاشقین‌لری اهالی گه کوپلب مالی و جانی زیان ییتکیزگن.

هرات حاکمی سوزلاوچیسی جیلانی فرهادنینگ ایتیشیچه، اوتگن بیر کیچه-کوندوز جریانیده هرات شهری شامل مذکور ولایت نینگ 10 تومنی وقفه‌سیز یامغیر و کوچلی سوو تاشقین‌لریگه گواه بولگن.

جناب فرهادگه کوره، اوشبو سوو تاشقین‌لری نتیجه‌سیده ادرسکن تومنیده 2 کیشی، زاول تومنیده 2 کیشی و اوبه تومنیده 1 کیشی هلاک بولگن.

هرات حاکمی سوزلاوچیسی نینگ ایتیشیچه، سوو تاشقین‌لری نتیجه‌سیده فلانکوچ تیپلی یولاوچی تاشیووچی بیر موتر 13 ایرکک، 2 باله و 2 عیال شامل 17 یولاوچیسی بیلن اوبه تومنی نینگ قیشلاقلریدن بیریده درک‌سیز یوقالگن و بو تومنده یوزلرچه چاروا تلف بولگن و شونینگدیک، اونلرچه اولتیریش اوی و مینگ‌لرچه جریب ایکینزار ییر ویران ایتیلگن.

هرات محلی مسؤوللریگه کوره، مذکور ولایت نینگ قیشلاقلریدن کوپینچه‌سینی اهالیسی اوی و جایلرینی ترک قیلیب و خوفسیز ییرلرگه باش‌پناه ایزلب بارگن‌لر.

شونینگدیک، بادغیس و فراه محلی مسؤوللری نینگ ایتیشیچه، بادغیس مرکزی قلعۀ‌نو شهری نینگ اطرافیده بولگن قیشلاقلردن بیرقطاری و فراه ولایتی نینگ پُرچمن و اناردره تومن‌لری سوو تاشقین‌لریگه گواه بولگن؛ بیراق بو سوو تاشقین‌لریده حاضرگچه کیم‌سه تلف بولمه‌گن.

عین حالده، پروان ولایتی نینگ سیدخیل و بگرام تومن‌لری یشاوچیلریدن بیرقطاری سلام‌وطندار بیلن تلیفون علاقه قوریب ایتیش‌لریچه، سوو تاشقین‌لری بار و یوقلرینی نابودلیک خطریگه روپه‌ره قیلگن.

شونینگدیک، نورستان و کنر ولایت‌لری نینگ تومن‌لریدن بیرقطاری سوو تاشقین‌لریگه گواه بولگن‌لر. مذکور ولایت‌لرنی محلی مسؤوللری نینگ ایتیشیچه، سوو تاشقین‌لرینی جانی تلفاتی یوق دیر، بیراق 60 دن آرتیق اوی بوزیلگن و یوزلرچه جریب ایکینزار ییر زیان کورگن.

پنجشیر ولایتیده یوز بیرگن سوو تاشقین‌لری هم اهالی گه مالی زیان ییتکیزگن. پنجشیر حاکمی سوزلاوچیسی عبدالودود علی‌مردان نینگ ایتیشیچه، یوز بیرگن سوو تاشقین‌لری باعث، حاضرگچه 5 اولتیریش اوی و 40 متردن آرتیق استنادی دیوار بوزیلگن.

عین حالده، سلام‌وطندارگه صحبت بیرگن طبیعی حادثه‌لرگه قرشی کوره‌ش ایشلری بوییچه دولت وزیرلیگی نینگ عمومی اطلاعات مسؤولی حشمت بهادری نینگ ایتیشیچه، حاضرگچه 17 ولایت سوو تاشقین‌لریگه گواه بولگن‌ و حاضرگچه هرات و باشقه ولایت‌لرده یوز بیرگن سوو تاشقین‌لریدن قالگن زیانلر میزانی و تلفات رقمی خصوصیده بولگن معلومات یکونلنمه‌گن، بیراق کابل شهریده 57 اولتیریش اوی بوتونله‌ی و باشقه 519 اولتیریش اوی قسماً بوزیلگن.

بهادری نینگ ایتیشیچه، تیکشیروولر یکونلنگنیدن سونگ، برچه ولایت‌لرده سوو تاشقین‌لریدن زیان کورگن‌لرگه ییگولیک آذیق-آوقت و باشقه کیره‌کلی نرسه ترقه‌تیلیشی ممکن.

جناب بهادری، کیله‌جک کونلرده باشقه ولایت‌لرده هم سوو تاشقین‌لری یوز بیریشیدن آگاه‌لنتیریب ایتیشیچه، کابل دینگیزی و باشقه بیرقطار دینگیزلرنی اطرافیده بولگن عایله‌لرگه اوی و جایلرینی ترک قیلیش‌لری ایتیلگن.

شو توغریده...

سوو تاشقین‌لری و باشقه طبیعی حادثه‌لر نتیجه‌سیده 147 کیشی هلاک بولگن